قازاقستان مۇسىلماندارى ءدىني باسقارماسى (قمدب) سوڭعى وقيعالارعا بايلانىستى مالىمدەمە جاساپ، جەكەلەگەن ادامداردىڭ ارەكەتى ءۇشىن يسلام ءدىنىن ايىپتاۋعا بولمايتىنىن ايتتى، دەپ حابارلايدى "ادىرنا".
«يسلامدا ءمىن جوق، ءمىن – ادامدا. جەكەلەگەن ادامداردىڭ قاتەلىگى ءدىننىڭ نەمەسە قمدب-نىڭ اتىنان جاسالمايدى. يسلامدا اجىراسۋ قۇپتالمايدى، الايدا ەرلى-زايىپتىلار اراسىندا تۇسىنىسپەۋشىلىك بولسا، اجىراسۋعا رۇقسات ەتىلەدى. الايدا شاريعاتتا ارنايى اجىراسىپ، ايەلدى باسقا بىرەۋگە بەرۋ ارەكەتىنە جول بەرىلمەيدى. قوعامدا تالقىلانىپ جاتقان قۇربانالى احمەت ەسىمدى ازامات قمدب-دا جۇمىس ىستەمەيدى، باسقارمامەن ءبىلىم بەرۋ نەمەسە باسقا باعىتتار بويىنشا ەشقانداي بايلانىسى جوق»، – دەلىنگەن مالىمدەمەدە.
قمدب قازاقستاندا يسلام قۇندىلىقتارىن رەسمي تۇردە ناسيحاتتايتىن جالعىز ورگان ەكەنىن اتاپ ءوتتى. سونىمەن قاتار يسلام ءدىنى حالىقتىڭ سالت-داستۇرىمەن تىعىز بايلانىستى ەكەنىن جەتكىزدى.
باسقارما قازاق حالقىنىڭ ۇلتتىق مەرەكەسى – ناۋرىزدى اتاپ وتۋگە رۇقسات ەتىلەتىنىن مالىمدەدى.
«ناۋرىز مەرەكەسىندە دىنگە قايشى كەلەتىن ەشقانداي ەلەمەنت جوق. جەكەلەگەن تۇلعالاردىڭ تەرىس پىكىرلەرى قمدب ۇستانىمىن بىلدىرمەيدى جانە ءبىز ونداي كوزقاراستى قولدامايمىز»، – دەلىنگەن حابارلامادا.
سونداي-اق سالافيتتىك، ۋاحاببيتتىك جانە تاكفيريتتىك اعىمداردىڭ كەيبىر وكىلدەرى ءدىن اتىنان پىكىر بىلدىرەتىنى ايتىلدى. قمدب بۇل دەسترۋكتيۆتى اعىمدارعا قارسى ءتۇسىندىرۋ جانە الدىن الۋ جۇمىستارىن جۇرگىزىپ، ولاردىڭ ىقپالىنا تۇسكەن ازاماتتاردى ءداستۇرلى دىنگە قايتارۋ باعىتىندا جۇمىس ىستەپ جاتقانىن حابارلادى.
ەسكە سالايىق، 1 ءساۋىر كۇنى ءماجىلىس دەپۋتاتى ەرمۇرات ءباپي باس پروكۋرور بەرىك اسىلوۆ پەن قمدب-عا ۇندەۋ جاساپ، ءوزىن «يمام» رەتىندە تانىستىرىپ، «ناۋرىزدىڭ يسلامعا قاتىسى جوق» دەپ مالىمدەگەن ازاماتقا قاتىستى شارا قولدانۋدى سۇراعان ەدى.
دەپۋتات ءسوز ەتكەن «يمام» – قۇربانالى احمەت. وعان «سوپىلىق شەيح»، «وڭتۇستىك قازاقستان (قازىرگى تۇركىستان) جانە جامبىل وبلىستارىنىڭ حاليفاسى»، «پايعامبار ۇرپاعى» دەگەن اتاقتار بەرىلىپ جۇرگەنى ايتىلعان. 29 ناۋرىزدا ونىڭ ارانداتۋشىلىق سيپاتتاعى مالىمدەمەلەرى ءۇشىن ايىپپۇل سالىنعانى حابارلانعان.
ال TikTok جەلىسىندە ناۋرىز مەرەكەسى تۋرالى تەرىس پىكىر ايتقان 1991 جىلى تۋعان ازاماتقا قاتىستى ۇلتارالىق الاۋىزدىقتى قوزدىرۋ بابى بويىنشا قىلمىستىق ءىس قوزعالعان بولاتىن. قازىرگى ۋاقىتتا ول قاماۋدا.
