مولدوۆا پارلامەنتى ەلدىڭ تاۋەلسىز مەملەكەتتەر دوستاستىعى (تمد) قۇرامىنان تۇپكىلىكتى شىعۋ تۋرالى شەشىمدى قولدادى. بۇل تۋرالى زاڭ شىعارۋشى ورگان 2 ساۋىردەگى جالپى وتىرىستا ەكىنشى وقىلىمدا قابىلدادى، دەپ حابارلايدى "ادىرنا".
شەشىمدى 60 دەپۋتات قولدادى. كيشينەۆ بۇل ۇيىم مەملەكەت اۋماعىنىڭ تۇتاستىعى، شەكاراسىنىڭ مىزعىماستىعى سياقتى باستى قۇندىلىقتاردى ساقتاۋدان قالدى دەپ ەسەپتەيدى.
ەندى قۇجاتقا ەل پرەزيدەنتى مايا ساندۋ قول قويادى. مەملەكەت باسشىسى وسى ۇيىمنان شىعۋدى جاقتاۋشىلاردىڭ ءبىرى بولعاندىقتان، تۇپكىلىكتى شەشىم قابىلداۋدا ەشقانداي قيىندىق تۋماۋعا ءتيىس.
مولدوۆانىڭ تمد قۇرامىنان شىعۋىنىڭ باستى سەبەپتەرىنىڭ ءبىرى – ۇيىم قۇندىلىقتارىنىڭ ساقتالماۋى. سەبەبى دوستاستىق ەلدەرى مەملەكەت اۋماعىنىڭ تۇتاستىعىن، شەكاراسىنىڭ مىزعىماستىعىن، ەگەمەندىگىن قۇرمەتتەۋگە ءتيىس ەدى.
قۇجاتتا رەسەيدىڭ ۋكرايناعا قارسى اسكەري اگرەسسياسى وسى قۇندىلىقتاردى ورەسكەل بۇزعانى ايتىلعان. زاڭ تۇسىندىرمەسىندە تمد رەسەيدىڭ ساياسي ىقپالىنىڭ قۇرالىنا اينالعانى، ماسكەۋ ونى بۇرىنعى سوۆەت رەسپۋبليكالارىنا قىسىم جاساۋ ءۇشىن پايدالانىپ وتىرعانى ايتىلعان.
ونىڭ ۇستىنە ەۋروينتەگراتسياعا ۇمتىلاتىن مولدوۆا ەندىگى جەردە تمد-عا مۇشە بولىپ قالا المايدى.
وسىلايشا تمد قۇرامىندا سەگىز ەل قالدى. ولار: ارمەنيا، ازەربايجان، بەلارۋس، قازاقستان، قىرعىزستان، وزبەكستان، رەسەي جانە تاجىكستان. كەيىنگى ۋاقىتتا ارمەنيا دا ۇيىمنىڭ كەيبىر قۇرىلىمدارىنا قاتىسۋدان شەت قالىپ ءجۇر، بىراق تمد قۇرامىنان تۇبەگەيلى شىققان جوق.
تاۋەلسىز مەملەكەتتەر دوستاستىعى ۇيىمىن 1991 جىلعى 8 جەلتوقساندا رەسەي، ۋكراينا جانە بەلارۋس قۇرعان. ال 21 جەلتوقساندا الماتى دەكلاراتسياسى قابىلدانىپ، تمد قۇرامىنا تاعى سەگىز ەل كىرگەن. گرۋزيا وعان 1993 جىلى قابىلدانىپ، 2009 جىلى شىعىپ كەتكەن. بالتىق ەلدەرى – ليتۆا، لاتۆيا جانە ەستونيا ۇيىمعا كىرۋدەن بىردەن باس تارتقان
