قوستاناي قالاسىندا ماس ءۇش ەر ادام پوليتسيا قىزمەتكەرىنە شابۋىل جاساپ، ونى بالالارىنىڭ كوزىنشە ۇرىپ-سوقتى، دەپ حابارلايدى "ادىرنا" ۇلتتىق پورتالى.
وقيعا ءساتى ۆيدەوعا ءتۇسىپ، جەلىدە تارادى. كادردان ءۇش ادامنىڭ فورماداعى قىزمەتكەرگە شابۋىل جاساپ، جەرگە قۇلاتىپ، تەپكىلەي باستاعانىن كورۋگە بولادى.
پوليتسيانىڭ مالىمەتىنشە، جانجالدىڭ سەبەبى قىزمەتكەردىڭ ەسكەرتۋى بولدى. پوليتسەي ءۇش ادامعا وزدەرىن دۇرىس ۇستاۋدى سۇراعان. الايدا ەر ادامدار وعان شابۋىل جاساعان. سول ساتتە پوليتسەيدىڭ جانىندا بالالارى بولعان. بالالار زارداپ شەككەن جوق. قازىر پوليتسيا قىزمەتكەرى امبۋلاتوريالىق ەم قابىلداپ جاتىر.
قوستاناي وبلىسى پوليتسيا دەپارتامەنتى بارلىق شابۋىل جاساعان ازاماتتار انىقتالىپ، ۇستالعانىن حابارلادى. قىلمىستىق ءىس قوزعالعان جانە كىنالىلەر تولىق جاۋاپكەرشىلىككە تارتىلاتىن بولادى.
