سادىر جاپاروۆ قىرعىزستان ازاماتتىعىن قابىلداۋ، ودان شىعۋ جانە ازاماتتىقتان ايىرۋ تۋرالى جارلىققا قول قويدى. بۇل تۋرالى رەسپۋبليكا باسشىسىنىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
بەرىلگەن مالىمەتتەرگە سايكەس، 127 ادام (ونىڭ ىشىندە 7 بالا) ازاماتتىقتان شىققان، ال 484 ادام (ونىڭ ىشىندە 24 بالا) ازاماتتىعىن جوعالتقان. سونىمەن قاتار، 893 ادام (137-ءسى بالالار) قىرعىزستان ازاماتتىعىن العان.
ازاماتتىق العانداردىڭ باسىم بولىگىن تاريحي وتانىنا ورالعان ەتنيكالىق قىرعىزدار، سونداي-اق ازاماتتىعىن قايتا قالپىنا كەلتىرىپ جاتقان تۇلعالار قۇرايدى. بۇعان قوسا، «بەلارۋس رەسپۋبليكاسى، قازاقستان رەسپۋبليكاسى، قىرعىز رەسپۋبليكاسى جانە رەسەي فەدەراتسياسى اراسىنداعى ازاماتتىقتى جەڭىلدەتىلگەن تارتىپپەن الۋ تۋرالى كەلىسىمدى راتيفيكاتسيالاۋ تۋرالى» زاڭ اياسىندا دا ازاماتتىق العاندار بار.
سونىمەن بىرگە، قىرعىزستان سىرتقى ىستەر مينيسترلىگى شەتەل ازاماتتارىنىڭ ەل اۋماعىندا بولۋ ءتارتىبى تۋرالى ەرەجەگە وزگەرىستەر ەنگىزىلگەنىن حابارلادى. اتاپ ايتقاندا، ەتنيكالىق قىرعىزدار مەن ولاردىڭ وتباسى مۇشەلەرىنىڭ قۇقىقتىق مارتەبەسىن رەتتەيتىن ارنايى نورما ەنگىزىلدى. وسىعان سايكەس، ۋاقتىلى رۇقسات قۇجاتتارىن راسىمدەمەگەن ادامدارعا قىرعىزستان اۋماعىنا ءبىر رەتتىك كىرۋگە جانە 30 جۇمىس كۇنى ىشىندە وزدەرىنىڭ قۇقىقتىق مارتەبەسىن زاڭداستىرۋعا مۇمكىندىك بەرىلەدى.
بۇعان دەيىن، 2025 جىلى قىرعىزستان ازاماتتارى دەپ تانىلۋى مۇمكىن تۇلعالار شەڭبەرىن كەڭەيتەتىن، سونداي-اق ازاماتتىقتان ايىرۋ نەگىزدەرىنىڭ ءتىزىمىن تولىقتىراتىن تۇزەتۋلەر قابىلدانعان بولاتىن.
