قىرعىزستان مەن تاجىكستان شەكاراسىنىڭ داۋلى ۋچاسكەلەرىنىڭ بىرىندە ەكى مەملەكەتتىڭ شەكاراشىلارى اراسىندا اتىس بولدى. بۇل تۋرالى قىرعىزستاننىڭ مەملەكەتتىك ۇلتتىق قاۋىپسىزدىك كوميتەتىنىڭ شەكارا قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
«2022 جىلدىڭ 10 ناۋرىزىندا مەملەكەتتىك شەكارانىڭ قىرعىز-تاجىك ۋچاسكەسىندە قارۋ قولدانۋ وقيعاسى ورىن الدى»، - دەلىنگەن حابارلامادا.
اتىس شامامەن جيىرما مينۋتقا سوزىلعان. قىرعىز تاراپىنان قاقتىعىس سالدارىنان جارالانعاندار مەن زارداپ شەككەندەر جوق. الدىن الا مالىمەت بويىنشا، تاجىك تاراپىنان جارالانعاندار بار.
قازىر ەكى ەلدىڭ وكىلدەرى كەلىسسوزدەر جۇرگىزىپ جاتىر.
ەستەرىڭىزگە سالايىق، قىرعىز-تاجىك شەكاراسىندا وسىعان دەيىن بىرنەشە قارۋلى قاقتىعىس بولدى. ەكى ەلدىڭ شەكاراسىنىڭ ۇزىندىعى 980 شاقىرىم. ونىڭ 500 شاقىرىمنان استامى ايقىندالىپ، قالعان بولىگى داۋلى كۇيىندە قالىپ وتىر. تەسكەي اۋدانى مەملەكەتتىك شەكارانىڭ بەلگىلەنبەگەن ۋچاسكەسى بولىپ سانالادى، بىراق ول اۋماقتى ءىس جۇزىندە قىرعىزستان ازاماتتارى پايدالانادى.
“ادىرنا” ۇلتتىق پورتالى
