قىرعىزستاندا پرەزيدەنت سادىر جاپاروۆتىڭ قارىنداسىنىڭ كۇيەۋ جىگىتى ۇستالدى. اقپاراتتى مەملەكەت باسشىسىنىڭ اكىمشىلىگى راستادى، - دەپ حابارلايدى "ادىرنا" ۇلتتىق پورتالى.
سادىر جاپاروۆتىڭ ءباسپاسوز حاتشىسى اسقات الاگوزوۆ Facebook جەلىسىندەگى پاراقشاسىندا قىرعىزستان پرەزيدەنتىنىڭ ءىنىسىنىڭ قىزىنىڭ كۇيەۋ جىگىتىن قۇقىق قورعاۋ ورگاندارى ۇستاعانىن راستادى.
«ءلاززات نۇرقوجاەۆانىڭ كۇيەۋ جىگىتى وعان تىكۇشاقپەن تۇرمىسقا شىعۋ تۋرالى ۇسىنىس جاساعاننان كەيىن تانىمالدىلىققا يە بولدى. بۇل جاس جىگىتتىڭ باستى ماقساتى ونىڭ زاڭسىز ارەكەتتەرىن قورعاۋ ءۇشىن بيلىك باسىنداعى ادامدارمەن بايلانىس ورناتۋ بولدى («شاتىر ىزدەۋ») دەپ ايتۋعا تولىق نەگىز بار»، - دەپ اتاپ ءوتتى اسقات الاگوزوۆ.
ول پرەزيدەنت سادىر جاپاروۆ كىم بولسا دا، كىمى بولسا دا زاڭسىز ارەكەتتەردى جاسىرمايتىنىن، قورعاۋعا تىرىسپايتىنىن باسا ايتتى.
اتاپ وتكەندەي، جىگىت پەن ونىڭ سىبايلاستارىنىڭ زاڭسىز ارەكەتتەرىنىڭ جاي-جاپسارى تەرگەۋ بارىسىندا ناقتىلانادى.
قىرعىز اقپارات قۇرالدارى جاقىندا توتەنشە جاعدايلار مينيسترلىگىنەن تىكۇشاق جالداپ تۇرمىسقا شىعۋعا ۇسىنىس جاساعان ەل پرەزيدەنتىنىڭ قارىنداسى ءلاززات نۇركوجوەۆانىڭ كۇيەۋ جىگىتى افتانديل سابىربەكوۆ ەكەنىن حابارلادى. وقيعادان تۇسىرىلگەن ۆيدەو قوعامدا ۇلكەن رەزونانس تۋدىرعان سوڭ، سادىر جاپاروۆ بولاشاق كۇيەۋ بالاسىنىڭ ىسىراپشىلدىعى ءۇشىن كەشىرىم سۇراۋعا ءماجبۇر بولدى.
