ناۋرىز مەيرامىندا كونە «بالۋان تاس» كوتەرۋ ءراسىمى قايتا جاڭعىرتىلدى، دەپ حابارلايدى "ادىرنا" ۇلتتىق پورتالى اكىمدىككە سىلتەپ.
ءىس-شارا تۇركىستان وبلىسى وتىرار اۋدانىنىڭ ورتالىعى ءشاۋىلدىر اۋىلىندا بولعان.
سالماعى شامامەن 200 كەلى بولاتىن تاس كوپشىلىك الدىندا ۇلتتىق داستۇرگە ساي كوتەرىلىپ، ارنايى تۇعىرعا ورناتىلدى. بۇل ءراسىمدى اقمولالىق بەلگىلى پالۋان ارمان سۇلەيمەن جۇزەگە اسىردى. شارا تۇركىستان وبلىسى اكىمدىگىنىڭ قولداۋىمەن «قازاق كۇشىنىڭ كارتاسى» مادەني-تانىمدىق جوباسى اياسىندا ۇيىمداستىرىلدى.
ءىس-شارا «تۇركىستان وبلىسىنا بالۋان تاس ساپارى» ەكسپەديتسياسىنىڭ ءۇشىنشى كۇنى ءوتتى. ەكسپەديتسيا جەتەكشىسى، «Baluan tas» ۇلتتىق سپورت تۇرلەرى جانە مادەنيەتى اكادەمياسىنىڭ پرەزيدەنتى ابىلايحان قالنازاروۆ بۇل باستامانىڭ تاريحي ماڭىزىن اتاپ ءوتتى.
"بۇرىن اۋىلعا اتاقتى بالۋان كەلسە، ەل اعالارى ودان «بالۋان تاس» كوتەرۋدى وتىنگەن. سوڭعى رەت بۇل ءراسىم وتكەن عاسىردىڭ 40-جىلدارى قاجىمۇقان مۇڭايتپاسۇلى تاراپىنان ورىندالعان. سودان بەرى ءدال وسى شارتپەن تاس كوتەرۋ بولماعان", - دەدى ول.
ءراسىم بارىسىندا ارمان سۇلەيمەن تاستى كوتەرىپ، تۇعىرعا قوندىردى. وسى ساتتەن باستاپ تاسقا «بالۋان تاس» مارتەبەسى بەرىلدى. مەرەكە قارساڭىندا پالۋانعا ات مىنگىزىپ، باتا بەرىلگەن.
