بىرىككەن ۇلتتار ۇيىمى باس حاتشىسى انتونيۋ گۋتەرريش ورمۇز بۇعازىنداعى كەمە قاتىناسىنىڭ قاۋىپسىزدىگىن قامتاماسىز ەتۋ ءۇشىن ارنايى ماقساتتى توپ قۇردى، دەپ حابارلايدى "ادىرنا" ۇلتتىق پورتالى.
بۇل تۋرالى بۇۇ باس حاتشىسىنىڭ رەسمي وكىلى ستەفان ديۋجارريك مالىمدەدى.
جاڭا قۇرىلعان توپتى بۇۇ-نىڭ جوبالارعا قىزمەت كورسەتۋ باسقارماسىنىڭ باسشىسى جورجە مورەيرا دا سيلۆا باسقارادى. ونىڭ ايتۋىنشا، باستامانىڭ باستى ماقساتى – ورمۇز بۇعازى ارقىلى گۋمانيتارلىق جۇكتەردىڭ قاۋىپسىز ءارى تۇراقتى تاسىمالدانۋىن قامتاماسىز ەتەتىن تەحنيكالىق تەتىكتەردى ازىرلەۋ.
رەسمي وكىلدىڭ سوزىنشە، ماقساتتى توپتىڭ جۇمىسى تىڭايتقىشتار مەن ماڭىزدى شيكىزات تاسىمالىن جولعا قويۋعا باعىتتالادى. بۇل باستاما الەمدىك ازىق-تۇلىك قاۋىپسىزدىگىنە دە وڭ اسەر ەتۋى مۇمكىن.
سونداي-اق، جوبا اياسىندا بۇۇ-نىڭ بۇعان دەيىن جۇزەگە اسىرعان حالىقارالىق تاجىريبەسىنە سايكەس قارا تەڭىزدەگى استىق كەلىسىمى ەسكەرىلمەك. مەحانيزمدى ىسكە اسىرۋ بارىسىندا ۇيىم مۇشە مەملەكەتتەرمەن تىعىز بايلانىستا جۇمىس ىستەپ، حالىقارالىق قۇقىق نورمالارى مەن ەلدەردىڭ ەگەمەندىگىن ساقتاۋعا باسىمدىق بەرەدى.
