Qyrǧyzstan tarihynda alǧaş ret öz ūlttyq valiutasyn basyp şyǧara bastady. Būl turaly Sadyr Japarov özınıŋ äleumettık jelıdegı paraqşasynda mälımdedı, dep habarlaidy "Adyrna".
Qyrǧyzstan basşysynyŋ aituynşa, būǧan deiın el ūlttyq valiutasyn şetelde basyp şyǧaruǧa tapsyrys beruge mäjbür bolǧan.
"Endı bärı özgerdı: bız sondai deŋgeige jettık, endı özımız basqa memleketterge de valiuta basyp şyǧara alamyz. Aqşa öndıru kezınde barlyq qajettı standarttar men talaptarǧa säikestıktı rastaityn halyqaralyq sertifikat aldyq", — dep jazdy ol.
Onyŋ atap ötuınşe, Qyrǧyzstan joǧary sapada jalpy azamattyq pasporttar, ID-kartalar, jürgızuşı kuälıkterı jäne kölık qūraldarynyŋ tehnikalyq pasporttaryn şyǧaryp keledı.
"Bız basqa elder üşın tek valiutany ǧana emes, türlı memlekettık qūjattardy da basyp şyǧaruǧa daiynbyz. Qazırgı uaqytta bırneşe memleketten tapsyrystar qabyldanyp jatyr. Sertifikattyŋ arqasynda önımımızdıŋ qorǧanysy eŋ joǧary deŋgeide. Iаǧni mūndai qūjattardy qoldan jasau mümkın emes. Sonymen qatar baǧalary da qoljetımdı", — dep qosty Sadyr Japarov.
Eske salaiyq, 2023 jyly Qyrǧyzstan tarihynda alǧaş ret öz ūlttyq pasporttaryn basyp şyǧara bastady. Sondai-aq 2025 jyldyŋ säuırınde el basqa memleketterdıŋ pasporttaryn şyǧarudy qolǧa alǧan. Būdan bölek, ötken jyldyŋ 3 qaraşasynan bastap elde jaŋartylǧan dizain men küşeitılgen qorǧanys elementterı bar 2025 jylǧy ülgıdegı jalpy azamattyq pasporttar men ID-kartalar ainalymǧa engızıldı.
