قازاقستان مەن رەسەيدىڭ بىرلەسكەن «بايتەرەك» جوباسى اياسىندا جوسپارلانعان «سۇڭقار» زىمىرانىن ستارتتىق كەشەنگە شىعارۋ مەرزىمى كەيىنگە قالدىرىلدى، دەپ حابارلايدى “ادىرنا” ۇلتتىق پورتالى.
الدىن الا جوسپار بويىنشا 24 ناۋرىزعا بەلگىلەنگەن زىمىراندى №45 الاڭعا شىعارۋ جۇمىستارى ەندى 26 ناۋرىزعا اۋىستىرىلدى. وسىعان بايلانىستى العاشقى سىناق ۇشىرۋ كۇنى دە وزگەردى.
مامانداردىڭ مالىمەتىنشە، «سۇڭقار» زىمىرانىنىڭ ۇشۋ سىناعى 29 ناۋرىز كۇنى استانا ۋاقىتىمەن ساعات 16:00-دە وتەدى دەپ جوسپارلانىپ وتىر. قاجەت بولعان جاعدايدا قوسىمشا تەكسەرىستەر جۇرگىزىلىپ، ۇشىرۋ مەرزىمى 30 ناۋرىز بەن 3 ءساۋىر ارالىعىنداعى رەزەرۆتىك كۇندەرگە شەگەرىلۋى مۇمكىن.
«بايتەرەك» عارىشتىق زىمىران كەشەنى – قازاقستان مەن رەسەيدىڭ بىرلەسكەن جوباسى. ونىڭ باستى ماقساتى – ەكولوگيالىق تۇرعىدان قاۋىپسىز وتىن قولداناتىن جاڭا بۋىن زىمىراندارىن ۇشىرۋعا ارنالعان ينفراقۇرىلىم قالىپتاستىرۋ. جوبا 2004 جىلى باستالىپ، 2005 جىلى رەسمي تۇردە ىسكە قوسىلعان.
باستاپقىدا بۇل كەشەندە «انگارا» زىمىرانىن پايدالانۋ جوسپارلانعان. الايدا كەيىن بۇل جوسپار وزگەرىپ، «سۇڭقار» زىمىرانى تاڭدالدى. ول بۇرىن «زەنيت» كەشەنىنە تيەسىلى ينفراقۇرىلىمدى جاڭعىرتۋ ارقىلى ىسكە اسىرىلادى.
