يران «باسيدج» اسكەريلەندىرىلگەن قۇرىلىمىنىڭ قولباسشىسى گولامرەزا سۇلەيماني مەن ۇلتتىق قاۋىپسىزدىك كەڭەسىنىڭ حاتشىسى ءالي ءلاريدجانيدىڭ قازا تاپقانىن راستادى، دەپ حابارلايدى «ادىرنا» ءتىلشىسى DW-گە سىلتەمە جاساپ.
يسلام رەۆوليۋتسياسى ساقشىلار كورپۋسىنىڭ رەسمي سايتىندا سۇلەيماني «تەرروريستىك شابۋىلدىڭ قۇربانى بولدى» دەپ كورسەتىلگەن. كسير وكىلدەرى ونىڭ ءولىمى ءۇشىن كەك الۋ نيەتىنەن باس تارتپايتىنىن دا ايتقان.
يراننىڭ ۇلتتىق قاۋىپسىزدىك كەڭەسى دە ءوز حاتشىسى ءالي ءلاريدجانيدىڭ قازا تاپقانىن راستادى. بۇعان دەيىن بۇل جوعارى لاۋازىمدى ەكى تۇلعانىڭ مەرت بولعانى تۋرالى يزرايل قورعانىس ارمياسى حابارلاعان بولاتىن، الايدا تەگەران بۇل اقپاراتتى بىردەن راستاعان جوق.
ءيزرايلدىڭ قورعانىس ءمينيسترى يسراەل كاتس سۇلەيماني 16 ناۋرىز كۇنى تەگەرانعا جاسالعان ءدال سوققى ناتيجەسىندە قازا تاپقانىن مالىمدەدى. ايتۋىنشا، لاريدجاني دە اۋە سوققىسى سالدارىنان مەرت بولعان.
يران پرەزيدەنتى ماسۋد پەزەشكيان ءلاريدجانيدىڭ ءولىمى ءۇشىن «كەك الاتىنىن» ايتتى.
ايتا كەتەيىك، «باسيدج» قۇرىلىمى كسير-گە باعىنىپ، ىشكى قاۋىپسىزدىك قىزمەتىن اتقارادى، سونىڭ ىشىندە ۇكىمەتكە قارسى نارازىلىقتاردى باسۋمەن اينالىسادى.
بۇعان دەيىن ءالي لاريدجاني يادرولىق باعدارلاما بويىنشا كەلىسسوزدەردى باقىلاپ، تەگەراننىڭ نەگىزگى سەرىكتەستەرىمەن، سونىڭ ىشىندە رەسەي، كاتار جانە ومان ەلدەرىمەن بايلانىس ورناتقان ەدى.
