Shymbulak тау курортында әуесқой шаңғышылар арасында шаңғымен жылдам сырғанау бойынша Қазақстан рекорды тіркелді. Бұл туралы Shymbulak курортының коммуникация департаменті жазды, деп хабарлайды «Адырна» тілшісі.
«Қазақстан рекордтар кітабы КИнЭС-2026 деректеріне сәйкес, ел рекордын әуесқой шаңғышы Сергей Апенко орнатты. Оның жылдамдық көрсеткіші – сағатына 160,953 км»,-делінген хабарламада.
Жылдамдық арнайы кәсіби ALGE Timing өлшеу жүйесі арқылы анықталған.
Шаңғышының айтуынша, бұл рекорд еліміздегі тау-шаңғы кластерін дамытуға қолдау білдіретін символикалық қадам болған.
«Үлкен жылдамдықпен сырғанауды дәл Shymbulak курортында өткізудегі мақсат – біздің тауларымыз бен трассалардың мүмкіндігін көрсету. Бұл жоба бұқаралық спорттың танымал болуына және Қазақстанның қысқы туризм орталығы ретіндегі беделін нығайтуға ықпал етеді деп үміттенемін»,– деді Сергей Апенко.
