جەزقازعان قالاسىنداعى «جىگەر» سپورت كەشەنىندە الداعى رەفەرەندۋمدى قولداۋعا ارنالعان «ادىلەتتى ءارى پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» اتتى فورۋم ءوتتى. ءىس-شاراعا مىڭعا جۋىق قاتىسۋشى جينالدى، دەپ حابارلايدى ۇلىتاۋ وبلىسىنىڭ اكىمدىگى.
فورۋم بارىسىندا قاتىسۋشىلارعا كونستيتۋتسيالىق وزگەرىستەردىڭ ماڭىزى، ولاردىڭ ەلدىڭ ودان ءارى دامۋىنا جانە ادىلەتتى، پروگرەسسيۆتى قوعام قالىپتاستىرۋداعى ءرولى ءتۇسىندىرىلدى. سونداي-اق رەفەرەندۋمنىڭ قازاقستاننىڭ بولاشاعى ءۇشىن ماڭىزدىلىعىنا ەرەكشە نازار اۋدارىلدى.
فورۋمعا مىڭعا جۋىق جاس قاتىستى. ولاردىڭ قاتارىندا ستۋدەنتتەر، جۇمىسشى ماماندىق يەلەرى، ۇلتتىق كومپانيالاردىڭ قىزمەتكەرلەرى، مەديتسينا سالاسىنىڭ وكىلدەرى، شىعارماشىل جاستار جانە وزگە دە بەلسەندى ازاماتتار بار.
جيىندا جەزقازعان قالالىق جاستار رەسۋرستىق ورتالىعىنىڭ ديرەكتورى ساكەن قايراتوۆ، «Amanat» پارتياسىنىڭ «جاستار رۋحى» جاستار قاناتى وبلىستىق فيليالىنىڭ ءتورايىمى نۇرگۇل تالعاتبەكوۆا، سونداي-اق «ۇلار-ۇلىتاۋ» قوعامدىق بىرلەستىگىنىڭ توراعاسى اباي وراز ءسوز سويلەدى. سپيكەرلەر جاستاردىڭ ەلدىڭ قوعامدىق-ساياسي ومىرىنە بەلسەندى قاتىسۋىنىڭ ماڭىزدىلىعىن اتاپ ءوتىپ، مەملەكەت بولاشاعىنا قاتىستى ماسەلەلەردە بەلسەندى بولۋعا شاقىردى.
فورۋم كونتسەرتتىك باعدارلامامەن جالعاستى. شارا بارىسىندا جاس ورىنداۋشىلار پاتريوتتىق اندەر ورىندادى.
ءىس-شارا اشىق ديالوگ پەن پىكىر الماسۋعا ارنالعان الاڭعا اينالىپ، ءوڭىردىڭ بەلسەندى جاستارىن الداعى رەفەرەندۋمدى قولداۋ جانە قازاقستاننىڭ ودان ءارى دامۋى يدەياسى توڭىرەگىندە بىرىكتىردى.
