Foto: nf group
Qazaqstan Bas prokuraturasynyŋ Aktivterdı qaitaru qyzmetı Dubaidaǧy 97 päterdıŋ Qazaqstan azamattaryna tiesılı boluy mümkın degen aqparatqa qatysty äzırge tekserıs jürgızuge negız joq ekenın mälımdedı. Būl turaly vedomstvo BES.media basylymynyŋ resmi saualyna jauap berdı, dep habarlaidy “Adyrna”.
Mäsele būǧan deiın jurnalist Manas Qaiyrtaiūly jariialaǧan aqparattan keiın qoǧamda talqylana bastady. Onyŋ aituynşa, Dubaidaǧy Fairmont The Palm qonaqüiınıŋ maŋynda ornalasqan tūrǧyn üi keşenınde şamamen 97 päter Qazaqstan azamattarynyŋ atyna tırkelgen boluy mümkın. Boljam boiynşa, päter ielerınıŋ qatarynda sudialar, būrynǧy ministrler, sondai-aq memlekettık qyzmetkerlerdıŋ jūbailary men balalary boluy yqtimal.
Osyǧan bailanysty BES.media tılşısı Qazaqstan Bas prokuraturasynyŋ Aktivterdı qaitaru qyzmetıne resmi saual joldap, būl derekter boiynşa tekserıs jürgızıle me degen sūraq qoiǧan. Vedomstvo ökılderı qoldanystaǧy zaŋnamaǧa säikes şetelde jyljymaityn mülıkke ie bolu zaŋ būzuşylyq bolyp sanalmaitynyn atap öttı.
«Uäkılettı organdar tarapynan resmi tekseruler jürgızılmeiınşe, şeteldegı jyljymaityn mülıktı yqtimal satyp alu nemese ielenu turaly jariialanǧan aqparatqa qūqyqtyq baǧa beru mümkın emes», – dep habarlady Bas prokuratura.
Vedomstvo sondai-aq memleketke zaŋsyz şyǧarylǧan aktivterdı qaitaru jūmystary jalǧasyp jatqanyn habarlady. Soŋǧy ekı jarym jyl ışınde prokuratura memleketke jalpy somasy 1,3 trln teŋgeden astam aktivtı qaitarǧan. Onyŋ ışınde naqty qaitarylǧan qarajat pen mülıktıŋ kölemı 1,076 trln teŋgenı qūraidy. Būl somanyŋ 968,5 mlrd teŋgesı aqşalai türde qaitarylsa, 107,7 mlrd teŋgesı mülık türınde, sonyŋ ışınde şeteldegı aktivter retınde memleket menşıgıne ötken.
Aita keteiık, Dubaidaǧy Palma Djumeira audanynda ornalasqan Fairmont The Palm qonaqüiı maŋynda juyrda taǧy bır oqiǧa tırkelgen. Resmi aqparatqa säikes, 28 aqpanda qonaqüi aumaǧyna irandyq «Şahed» ūşqyşsyz apparaty qūlaǧan. Oqiǧa saldarynan tört adam jaraqat alyp, medisinalyq mekemelerge jetkızılgen.
