ۇكىمەتتى دوعارىسقا جىبەرگەن. تۇڭعىش پارلامەنتتىڭ سايلاۋى وتكەن كۇن

1994 جىلدىڭ 7 ناۋرىزىندا قازاقستان تاريحىندا تاۋەلسىزدىك كەزەڭىندەگى العاشقى پارلامەنت سايلاۋى ءوتتى، دەپ حابارلايدى "ادىرنا" ۇلتتىق پورتالى.

ناتيجەسىندە قازاقستان جوعارعى كەڭەسى قۇرامىنا 176 دەپۋتات سايلاندى.

سايلاۋ 1993 جىلعى 17 جەلتوقساندا قابىلدانعان «سايلاۋ تۋرالى» كودەكس نەگىزىندە ءوتتى. دەپۋتاتتاردىڭ 42-ءسى پرەزيدەنتتىك ءتىزىم بويىنشا، 75-ءى قوعامدىق ۇيىمداردان، ال 59-ى ءوزىن-ءوزى ۇسىنۋ ارقىلى ءبىر مانداتتى وكرۋگتەردەن سايلاندى.

سايلاۋعا بىرنەشە ساياسي پارتيالار مەن قوعامدىق ۇيىمدار قاتىسقانىمەن، «ازات» جانە «جەلتوقسان» قوزعالىستارى بويكوت جاريالادى. رەسمي بيلىك سايلاۋ اشىق ءارى دەموكراتيالىق تالاپتارعا ساي وتكەنىن مالىمدەدى. الايدا وپپوزيتسيالىق توپتار مەن حالىقارالىق باقىلاۋشىلار سايلاۋ بارىسىندا بىرقاتار كەمشىلىكتەر بولعانىن ايتتى.

جوعارعى كەڭەستە ءتۇرلى ساياسي كۇشتەردەن قۇرالعان فراكتسيالار مەن دەپۋتاتتىق توپتار جۇمىس ىستەدى. پارلامەنتتە العاش رەت وپپوزيتسيالىق توپتار دا قالىپتاستى. سونىڭ ءبىرى – قازاقستان حالىق كونگرەسى پارتياسى، سوتسياليستىك پارتيا جانە كاسىپوداقتار فەدەراتسياسى دەپۋتاتتارى قۇرعان «پروگرەسس» توبى بولدى.

پارلامەنتتىڭ العاشقى توراعاسى بولىپ سەرىكبولسىن ءابدىلدين سايلاندى. سول كەزەڭدە ەل پرەزيدەنتى قىزمەتىن نۇرسۇلتان نازارباەۆ اتقاردى.

بۇل پارلامەنت ەل تاريحىندا بىرقاتار ماڭىزدى شەشىمدەر قابىلدادى. سونىڭ ىشىندە دەپۋتاتتار سەرگەي تەرەششەنكو باسقاراتىن ۇكىمەتكە سەنىمسىزدىك ءبىلدىرىپ، كەيىن ۇكىمەت وتستاۆكاعا كەتتى.

الايدا 1994 جىلعى پارلامەنت ۇزاق جۇمىس ىستەگەن جوق. قازاقستان رەسپۋبليكاسىنىڭ كونستيتۋتسيالىق سوتى سايلاۋ زاڭناماسىنىڭ كەيبىر نورمالارى كونستيتۋتسياعا سايكەس كەلمەيدى دەگەن شەشىم شىعارعاننان كەيىن، 11 اي جۇمىس ىستەگەن جوعارعى كەڭەس زاڭسىز سايلانعان دەپ تانىلدى.

ناتيجەسىندە 1995 جىلدىڭ ناۋرىزىندا پارلامەنت تاراتىلدى.