سالۆادور پرەزيدەنتى نايب بۋكەلەگە شەكسىز قايتا سايلانۋعا جانە ونىڭ پرەزيدەنتتىك مەرزىمىن التى جىلعا دەيىن ۇزارتۋعا مۇمكىندىك بەرەتىن كونستيتۋتسيالىق وزگەرىستەر قابىلداندى، دەپ حابارلايدى "ادىرنا" ۇلتتىق پورتالى CNN-گە سىلتەمە جاساپ.
31 شىلدە كۇنى ەل پارلامەنتى — زاڭ شىعارۋ پالاتاسى «جاڭا يدەيالار» پارتياسىنىڭ باستاماسىمەن كونستيتۋتسياعا بىرقاتار تۇزەتۋلەر ەنگىزدى. ۇسىنىستى پارتيا دەپۋتاتى انا فيگەروا ۇسىنعان. جاڭا وزگەرىستەردىڭ ءبىرى — سايلاۋدىڭ ەكىنشى كەزەڭىن الىپ تاستاۋ، ياعني ەندى پرەزيدەنتتىك سايلاۋدا جەڭىسكە جەتۋ ءۇشىن كوپ داۋىس جيناۋ جەتكىلىكتى.
كونستيتۋتسيالىق وزگەرىستەردى 57 دەپۋتات قولداپ، تەك 3 دەپۋتات قارسى داۋىس بەردى. بۇل – بۋكەلەنىڭ پارتياسىنىڭ پارلامەنتتەگى كوپشىلىك مانداتقا يە بولۋىمەن تۇسىندىرىلەدى.
ايتا كەتەيىك، 2021 جىلى بۋكەلەنىڭ ءوزى تاعايىنداعان جوعارعى سوت سۋديالارى كونستيتۋتسياداعى ەكىنشى مەرزىمگە تىيىمدى الىپ تاستاعان بولاتىن. وسىلايشا، ول 2024 جىلى وتە كوپ داۋىسپەن قايتا سايلاندى. ەندى قابىلدانعان جاڭا تۇزەتۋلەر وعان پرەزيدەنتتىككە شەكسىز رەت تۇسۋگە زاڭ جولىن اشىپ وتىر.
الايدا، بۇل شەشىم قوعامدا الاڭداۋشىلىق تۋعىزدى. وپپوزيتسيالىق دەپۋتات مارسەلا ۆيللاتورو بۇل جاعدايدى «سالۆادوردا دەموكراتيا ءولدى» دەپ سيپاتتاپ، بيلىكتىڭ شەكتەن تىس شوعىرلانۋى، سىبايلاس جەمقورلىقتىڭ كۇشەيۋى جانە ساياسي بەلسەندىلىكتىڭ تومەندەۋ قاۋپىنە نازار اۋداردى.
بۋكەلە ءوز كەزەگىندە حالىققا ءوزىن «الەمدەگى ەڭ زاماناۋي ديكتاتور» دەپ تانىستىرىپ، ەلدەگى قىلمىسپەن كۇرەستە قاتاڭ ساياسات جۇرگىزۋگە ۋادە بەرىپ كەلەدى. بۇرىنعى بيلىك وكىلدەرىمەن قىلمىستىق توپتار اراسىندا كەلىسىم بولعانى تۋرالى كۇدىككە ىلىنسە دە، ەلدەگى قاۋىپسىزدىك پەن ءتارتىپتىڭ جاقسارعانىن سەزىنگەن تۇرعىنداردىڭ كوبى وعان قولداۋ بىلدىرۋدە.
