قازاقستاندىق شاحماتشى، بليتس بويىنشا ءۇش دۇركىن الەم چەمپيونى اساۋباەۆا سپورتتاعى سەكسيزم مەن ادىلەتسىزدىك تۋرالى پىكىر ءبىلدىردى، دەپ حابارلايدى "ادىرنا" ۇلتتىق پورتالى Tengri-گە سىلتەپ.
2025 جىلدىڭ شىلدە ايىندا فيشەر شاحماتى بويىنشا تۋرنيردە اساۋباەۆا الەمدىك رەيتينگتە 17-ورىندا تۇرعان امەريكالىق گروسسمەيستەر لەنەر دومينگەس پەرەسپەن كەزدەستى.
ويىن ەرەجەسىنە سايكەس 40-شى جۇرىسكە دەيىن تەڭ ويىن ۇسىنۋعا بولمايتىن. دومينگەس وسى ەرەجەدەگى ولقىلىقتى پايدالانىپ، شامامەن 100 ءجۇرىس بويى ءبىر پوزيتسيانى قايتالاپ ويناعان. سونىڭ سالدارىنان بيبيسارا اساۋباەۆامەن ويىن تەڭ بولعان. شاحماتشى قارسىلاسىنىڭ ارەكەتىن قۇرمەتسىزدىك دەپ باعالادى.
اساۋباەۆانىڭ ايتۋىنشا، جوعارى رەيتينگتەگى ويىنشىنىڭ وزىنەن تومەن قارسىلاسىن جەڭە الماۋى پسيحولوگيالىق تۇرعىدا اۋىر بولۋى مۇمكىن.
«ونىڭ اق تاستارمەن ويناپ، رەيتينگ ايىرماشىلىعى 200 ۇپاي بولسا دا مەنى جەڭە الماۋى وعان جاعىمسىز بولعانىن تۇسىنەمىن. ول پارتيانى مەن وتە جاقسى وتكىزدىم. جالپى، مۇنداي پوزيتسيادا ويىندى سوزۋ ارتىق بولدى»، – دەدى ول.
سونىمەن قاتار، شاحماتشى سپورتتاعى سەكسيزم ماسەلەسىنە دە توقتالدى. ونىڭ سوزىنشە، مۇنداي جاعدايلار سيرەك كەزدەسەدى.
«نەگىزى ونداي جاعدايلار وتە از بولادى. سەبەبى ءبىز ءبارىمىز كاسىبي ماماندارمىز، شاحماتتا كوپ جىلدان بەرى جۇرگەن ادامدارمىز جانە ءبىر-ءبىرىمىزدى جاقسى تۇسىنەمىز»، – دەدى چەمپيون.
ايتا كەتەيىك، وسى تۋرنيردە اساۋباەۆا الەمنىڭ ۇزدىك شاحماتشىسى ماگنۋس كارلسەنمەن دە ويناعان. ويىننان كەيىن كارلسەن ونىڭ جۇرىستەرىن جوعارى باعالاپ، بىرنەشە كەڭەس بەرگەن.
