ءماجىلىس دەپۋتاتى، Respublica پارتياسى تەڭ توراعالارىنىڭ ءبىرى دينارا شۇكىجانوۆا ءوز ەركىمەن مانداتىن تاپسىرىپ، وڭىردەگى وندىرىسپەن اينالىساتىنىن ايتتى.
«بالكىم، دەموكراتيانىڭ بەلگىسى شىعار»
جالپى دەپۋتاتتاردىڭ مانداتىن ءوز ەركىمەن تاپسىرىپ كەتۋى سيرەك، توسىن جاعداي. سوندىقتان دا دينارا امانجەلقىزىنا دەپۋتاتتىق مانداتتى تاپسىرىپ بەرۋگە بىرەۋ يتەرمەلەگەن جوق پا دەپ سۇراق قويدىق. بۇل سۇراققا ەكس-دەپۋتات «جوق» دەپ جاۋاپ بەردى.
– بۇل نۇسقانىڭ نەگىزسىز ەكەنىن بىردەن اشىپ الايىق. ءيا، دەپۋتات مانداتىن ءوز ەركىمەن تاپسىرۋ توسىن ارەكەت بولۋى مۇمكىن. بىراق مەنىڭ شەشىمدى قۇپتاعانى ءۇشىن ارىپتەستەرىمە العىسىمدى بىلدىرەمىن. دەپۋتاتتار بۇگىن مەنى ءوز جۇمىسىممەن اينالىسۋعا جىبەرۋدى قولداپ، داۋىس بەردى. بۇل ءۇشىن ءماجىلىس توراعاسى ەرلان جاقانۇلىنا العىسىمدى بىلدەرەمىن. بالكىم، بۇل «جاڭا قازاقستاننىڭ»، دەموكراتيالىق ەل بولۋدىڭ بەلگىسى شىعار. مىسالى، ءبىز پارتيا ىشىندە ورنىمىزدى روتاتسيا ارقىلى جاڭارتىپ، ءبىر ورىنعا جابىسىپ وتىرمايمىز دەپ كەلىسكەن بولاتىنبىز. مۇنى ءبىز ءىس جۇزىنە اسىرىپ جاتىرمىز، – دەدى ول.
دينارا شۇكىجانوۆا جاس ءارى جىگەرلى دەپۋتات بولعانىمەن، مەملەكەتتىك ءتىلدى بىلمەيتىنىمەن ەستە قالدى. قازاق تىلىندەگى سۇراققا ورىس تىلىندە جاۋاپ بەرگەننەن كەيىن «امەريكالىق ديپلومات 9 ايدا قازاق ءتىلىن ۇيرەنىپ الدى. پارلامەنتتە دەپۋتات بولعان 10 ايدىڭ ىشىندە قازاق ءتىلىن ۇيرەنبەگەنىڭىز ۇيات ەمەس پە؟» دەپ سۇراق قويدىق. كەيبىر ورىس ءتىلدى جۋرناليستەر «نەگىزسىز سۇراق» دەپ جاۋاپ بەرمەۋدى سۇراعاندا ەكس-دەپۋتات «دۇرىس سۇراق» دەپ قازاق تىلىندە جاۋاپ بەرۋگە تىرىستى.
– مەن سىزگە قازاقشا ايتا بەرەمىن. مەن قازاق ءتىلىن دە ۇيرەندىم. قازىر قازاقشا دا، ورىسشا دا، اعىلشىنشا دا سويلەيمىن. ءسىز دۇرىس ايتاسىز، پارلامەنتكە كەلگەندە قازاقشا وتە قينالىپ سويلەدىم. قازىر دە مەنىڭ ويىمشا، مەنىڭ قازاق ءتىلىم جاقسى ەمەس. مويىندايمىن. بىراق ءبىزدىڭ كوميتەتتىڭ وتىرىستارى قازاق تىلىندە بولادى. سوندا مەندە قازاقشا سويلەدىم. سونىمەن ءسىزدىڭ سۇراعىڭىز «نەگە قازاق تىلىندە سويلەمەيسىڭ؟» دۇرىس ەمەس. ياعني، مەن قازاقشا سويلەيمىن، – دەپ جاۋاپ بەردى كەلگەنىنەن كەتەرى تەز بولعان دەپۋتات.
«ءالى شەشىلگەن جوق»
Respublica پارتياسىنىڭ توراعاسى ءارى ءماجىلىس دەپۋتاتى ايداربەك قوجانازاروۆ دينارا شۇكىجانوۆانىڭ دەپۋتاتتىق مانداتىنا بايلانىستى پارتيا ىشىندە قايشىلىق جوق ەكەنىن ايتتى.
– دينارا شۇكىجانوۆامەن پارتيا قۇرىلماي تۇرعان كەزەڭنەن جاقىن دوسپىز جانە بۇدان كەيىندە جاقىن ارالاسامىز. بۇل – ارامىزدا ەشقانداي قايشىلىق بولماعانىنىڭ بەلگىسى. ول ءبىزدىڭ پارتيامىزدىڭ تەڭ توراعاسى جانە ورتالىق كەڭەستىڭ مۇشەسى بولىپ قالادى. بىرىنشىدەن، دينارا شۇكىجانوۆا وزىنە قويىلعان ماقساتتارىنا جەتتى. تاياۋدا «ەندى مەن جاڭا جوبا الماي، دەپۋتاتتىق مانداتتى وتكىزىپ، باسقا كانديداتتاردى ەنگىزبەيمىز بە؟» دەگەن ۇسىنىسپەن شىقتى. ارىپتەستەرىمىزبەن بىرگە اقىلداسىپ، شىنىمەن دە ءبىزدىڭ ارتىمىزدان كەلە جاتقان كانديداتتاردى الدىمىزعا نەگە شىعارمايمىز دەگەن وي بولدى. سونداي-اق ءبىزدىڭ سايلاۋشىلارىمىزعا جانە بىزگە داۋىس بەرمەگەن ادامدارعا دا، ءبىزدىڭ تىزىمدە لايىقتى كانديداتتار بار ەكەنىن كورسەتۋ ساياساتىمىز بولدى. ەندىگى سايلاۋدا كوبىرەك ورىن بەرسە، مۇنداي اينالىم بولماي باسىنان باستاپ اياعىنا دەيىن جۇمىس ىستەيتىن ەدىك، – دەدى ول.
پارتيا جەتەكشىسى دينارا شۇكىجانوۆانىڭ ورنىنا كىم دەپۋتات بولاتىنىن اشىق ايتپادى.
– قازىر مەن سىزگە ونداي اقپاراتتى بەرە المايمىن. سەبەبى ول باسقا كانديداتتار ءۇشىن ادىلەتسىز بولادى. ءبىر اپتانىڭ ىشىندە ءبىز شەشىم قابىلدايمىز. كىمنىڭ دەپۋتات بولاتىنى ءالى شەشىلگەن جوق، – دەدى ول.
سەرىك جولداسباي
«ادىرنا» ۇلتتىق پورتالى
