فوتو: Alejandra Leyva/AP Photo/picture allianc
مەكسيكادا ءىرى ەسىرتكى كارتەلىنىڭ جەتەكشىسىنىڭ قازا تابۋى ەلدىڭ بىرنەشە وڭىرىندە جاپپاي تارتىپسىزدىككە ۇلاستى. اسكەري وپەراتسيا بارىسىندا «ەل مەنچو» لاقاپ اتىمەن تانىلعان نەمەسيو وسەگەرا سەرۆانتەس كوز جۇمعانى ايتىلدى، دەپ حابارلايدى "ادىرنا".
مەكسيكانىڭ ۇلتتىق قورعانىس مينيسترلىگىنىڭ مالىمەتىنشە، ول حاليسكو شتاتىندا اسكەريلەرمەن بولعان قاقتىعىس كەزىندە جارالانىپ، مەحيكوعا جەتكىزۋ جولىندا قايتىس بولعان. وسەگەرا سەرۆانتەس ۇزاق جىلدار بويى «حاليسكو جاڭا بۋىنى» (Jalisco New Generation Cartel) كارتەلىن باسقارعان.
قاقتىعىستاردان كەيىن ەلدىڭ بىرقاتار ايماعىندا جول توسقاۋىلدارى قويىلىپ، كولىكتەر ورتەلدى. قىلمىستىق توپتار اسكەري وپەراتسيالارعا كەدەرگى كەلتىرۋ ءۇشىن نەگىزگى جولداردى جاۋىپ تاستاعان.
حاليسكو شتاتىنىڭ گۋبەرناتورى پابلو لەمۋس ناۆاررو ايماقتا «قىزىل قاۋىپ كودىن» جاريالادى. قوعامدىق كولىك قوزعالىسى ۋاقىتشا توقتاتىلىپ، تۇرعىندارعا ۇيلەرىنەن شىقپاۋعا كەڭەس بەرىلدى.
مەكسيكانىڭ قاۋىپسىزدىك قىزمەتتەرى ەل بويىنشا 252 جول توسقاۋىلى تىركەلگەنىن مالىمدەدى. ونىڭ 65-ءى حاليسكو شتاتىندا بولعان.
تارتىپسىزدىكتەر پۋەرتو-ۆاليارتا قالاسىنا دا اسەر ەتتى. الەۋمەتتىك جەلىلەردە قالا ۇستىنەن كوتەرىلگەن ءتۇتىن مەن اۋەجايداعى دۇربەلەڭ بەينەلەنگەن ۆيدەولار تارادى. بىرقاتار اۋە كومپانيالارى قاۋىپسىزدىككە بايلانىستى رەيستەردى ۋاقىتشا توقتاتتى.
شتات استاناسى - گۆادالاحارا قالاسىندا دا قاقتىعىستار تىركەلدى. بۇل قالادا الداعى ۋاقىتتا ءىرى حالىقارالىق سپورتتىق شارالار ءوتۋى جوسپارلانعان.
مەكسيكا پرەزيدەنتى كلاۋديا شەينباۋم جول توسقاۋىلدارىنىڭ بارىن راستاعانىمەن، ەلدىڭ باسىم بولىگىندە جاعداي قالىپتى ەكەنىن مالىمدەدى.
ايتا كەتسەك، «حاليسكو جاڭا بۋىنى» كارتەلى اقش-قا فەنتانيل جانە وزگە دە ەسىرتكى تۇرلەرىن زاڭسىز جەتكىزۋمەن تانىمال. ۇيىم مەكسيكاداعى ەڭ ىقپالدى ءارى قاتىگەز قىلمىستىق قۇرىلىمداردىڭ ءبىرى سانالادى.
اق ءۇيدىڭ ءباسپاسوز حاتشىسى كەرولاين ليۆيتت اقش بۇل وپەراتسياعا بارلاۋ دەرەكتەرىن ۇسىنعانىن حابارلادى. ال اقش مەملەكەتتىك حاتشىسىنىڭ ورىنباسارى كريستوفەر لانداۋ كارتەل جەتەكشىسىنىڭ ءولىمىن «ماڭىزدى وقيعا» دەپ باعالادى.
ساراپشىلاردىڭ پىكىرىنشە، ناركوباروننىڭ جويىلۋى قىسقا مەرزىمدە تۇراقسىزدىق تۋعىزعانىمەن، ۇزاق مەرزىمدە ايماقتاعى قىلمىستىق قۇرىلىمداردىڭ ىقپالىنا اسەر ەتۋى مۇمكىن. الايدا قازىرگى تاڭدا مەكسيكانىڭ باتىس وڭىرلەرىندە قاۋىپسىزدىك شارالارى كۇشەيتىلگەن.
