قازاقستاندا ورىس پراۆوسلاۆيە شىركەۋىنەن بولەك تاۋەلسىز پراۆوسلاۆيە شىركەۋىن قۇرۋ ارەكەتى ءۇشىن قىسىم كورسەتىلگەنىن بۇعان دەيىن مالىمدەگەن بۇرىنعى ءدىني قىزمەتكەر ياكوۆ ۆورونتسوۆ اكىمشىلىك قاماۋ مەرزىمىن وتەگەننەن كەيىن قايتا ۇستالدى، دەپ حابارلايدى "ادىرنا" پورتالى قازتاگ اگەنتتىگىنە سىلتەپ.
ادۆوكات عالىم نۇرپەيىسوۆتىڭ ايتۋىنشا، ۆورونتسوۆقا قر قىلمىستىق كودەكسىنىڭ 302-بابى («ەسىرتكى، پسيحوتروپتىق زاتتاردى تۇتىنۋ ءۇشىن پريتوندار ۇيىمداستىرۋ نەمەسە ۇستاۋ») جانە 296-بابى («ەسىرتكى زاتتارىمەن وتكىزۋ ماقساتىنسىز زاڭسىز جۇمىس ىستەۋ») بويىنشا ايىپ تاعىلىپ وتىر. ۇستاۋ تۋرالى حاتتاما راسىمدەلگەن.
بۇگىن ونىڭ اكىمشىلىك قاماۋ مەرزىمى اياقتالعانىمەن، ول بوستاندىققا شىقپاعان. ادۆوكاتتىڭ مالىمەتىنشە، 23 اقپان كۇنى تاڭەرتەڭ ۆورونتسوۆ 72 ساعاتقا قاماۋعا الىنعان. قازىرگى ۋاقىتتا ول قىلمىستىق ءىس اياسىندا كۇدىكتى رەتىندە تانىلعان. زاڭعا سايكەس، 72 ساعات ىشىندە وعان قاتىستى بۇلتارتپاۋ شاراسى تاڭدالۋى ءتيىس.
بۇعان دەيىن الماتى قالاسى پوليتسيا دەپارتامەنتى «ەسىرتكى زاتتارىن تۇتىنۋ ءۇشىن پريتون ۇيىمداستىرۋ» فاكتىسى بويىنشا قىلمىستىق ءىس تەرگەلىپ جاتقانىن حابارلاعان بولاتىن.
اكىمشىلىك قاماۋدا بولعان كەزىندە ۆورونتسوۆ ادۆوكاتى ارقىلى حات جاريالاپ، تاعىلعان ايىپتاردى جوققا شىعارعان. ول وزىنە قاتىستى ارەكەتتەردى قازاقستاندا ورىس پراۆوسلاۆيە شىركەۋىنەن تاۋەلسىز پراۆوسلاۆيە قۇرىلىمىن قۇرۋ باستاماسىمەن بايلانىستىرعان.
سونداي-اق بۇعان دەيىن ۆورونتسوۆ «ەكسترەميزم» بابى بويىنشا قوزعالعان قىلمىستىق ءىستىڭ توقتاتىلعانىن مالىمدەگەن. 12 اقپاندا ول الماتى قالاسىنىڭ ادىلەت دەپارتامەنتىنە ءدىني بىرلەستىكتى مەملەكەتتىك تىركەۋدەن باس تارتۋدى زاڭسىز دەپ تانۋ تۋرالى تالاپ-ارىز بەرگەنى حابارلانعان.
ياكوۆ ۆورونتسوۆ قازاقستاندىق قوعامداعى وزەكتى ماسەلەلەرگە قاتىستى اشىق ءارى سىني كوزقاراسىمەن تانىمال. 2023 جىلعى 19 ماۋسىمدا ونىڭ ءدىني قىزمەتىن توقتاتۋ تۋرالى شەشىم قابىلدانعانى بەلگىلى.
