اراب مەملەكەتتەرى ليگاسى اقش-تىڭ يزرايلدەگى ەلشىسى مايك حاكابيدىڭ ءيزرايلدىڭ ءىس جۇزىندە تاياۋ شىعىستىڭ باسىم بولىگىنە قۇقىعى بار دەگەن مالىمدەمەسىن قاتاڭ ايىپتادى. بىرلەسكەن مالىمدەمە 22 اقپانعا قاراعان ءتۇنى ساۋد ارابياسى ءسىم-ءنىڭ X الەۋمەتتىك جەلىسىندەگى پاراقشاسىندا جاريالاندى، دەپ حابارلايدى «ادىرنا» ءتىلشىسى.
قۇجات اۆتورلارى ەلشىنىڭ مالىمدەمەلەرىنە بايلانىستى وزدەرىنىڭ تەرەڭ الاڭداۋشىلىعىن ءبىلدىردى.
«ول ءوز سوزىندە يزرايل ءۇشىن اراب مەملەكەتتەرىنە تيەسىلى اۋماقتاردى، سونىڭ ىشىندە وككۋپاتسيالانعان باتىس جاعالاۋدى باقىلاۋدا ۇستاۋ قولايلى بولار ەدى دەگەن يشارا جاساعان»، – دەپ اتاپ ءوتتى اۆتورلار.
مالىمدەمەنى ەگيپەت ءسىم، يوردانيا ءسىم، ءباا ءسىم، يندونەزيا ءسىم، پاكىستان ءسىم، تۇركيا ءسىم، كاتار ءسىم، كۋۆەيت ءسىم، ومان ءسىم، باحرەين ءسىم، ليۆان ءسىم، سيريا ءسىم جانە پالەستينا ۇلتتىق اكىمشىلىگى قولداعان.
ءباا ءسىم مالىمدەۋىنشە، بىرلەسكەن ۇندەۋگە قول قويعان ەلدەر مۇنداي «قاۋىپتى ءارى ارانداتۋشىلىق سيپاتتاعى» مالىمدەمەلەردى ءۇزىلدى-كەسىلدى قابىلدامايتىنىن راستادى. ولار بۇل سوزدەر حالىقارالىق قۇقىق قاعيداتتارى مەن بىرىككەن ۇلتتار ۇيىمى جارعىسىن ورەسكەل بۇزۋ بولىپ سانالاتىنىن جانە ءوڭىردىڭ قاۋىپسىزدىگى مەن تۇراقتىلىعىنا ەلەۋلى قاتەر توندىرەتىنىن اتاپ ءوتتى.
اراب جانە يسلام ەلدەرىنىڭ سىرتقى ىستەر مينيسترلىكتەرى ءيزرايلدىڭ وككۋپاتسيالانعان پالەستين اۋماعى مەن باسقا دا وككۋپاتسيالانعان اراب جەرلەرىنە قاتىستى ەشقانداي ەگەمەندىگى جوق ەكەنىن مالىمدەدى. سونىمەن قاتار ولار باتىس جاعالاۋدى اننەكسيالاۋ نەمەسە ونى گازا سەكتورىنان ءبولۋ ارەكەتتەرىن قابىلدامايتىنىن جانە ءيزرايلدىڭ قونىستاندىرۋ ساياساتىن كەڭەيتۋىنە تاباندى تۇردە قارسى ەكەنىن ءبىلدىردى.
سونىمەن قاتار قۇجاتقا يسلام ىنتىماقتاستىعى ۇيىمى مەن پارسى شىعاناعى اراب مەملەكەتتەرىنىڭ ىنتىماقتاستىق كەڭەسى سياقتى بىرقاتار حالىقارالىق ۇيىم دا قوسىلعان.
ايتا كەتەيىك، اقش-تىڭ يزرايلدەگى ەلشىسى مايك حاكابي جۋرناليست تاكەر كارلسونگە بەرگەن سۇحباتىندا ءيزرايلدىڭ تاياۋ شىعىستىڭ بۇكىل اۋماعىنا ءىس جۇزىندە «بيبلەيلىك» قۇقىعى بار ەكەنىن مالىمدەگەن. ونىڭ ايتۋىنشا، بۇل اۋماققا قازىرگى يوردانيا، سيريا، ليۆان، سونداي-اق ساۋد ارابياسى مەن يراكتىڭ ءبىر بولىكتەرى كىرەدى.
