ىلە-الاتاۋى مەملەكەتتىك ۇلتتىق تابيعي پاركىنىڭ باس ديرەكتورى ەلنۇر احمەتوۆ جۋرناليستەرمەن كەزدەسىپ، ۇلتتىق پاركتىڭ سوڭعى جىلدارداعى جۇمىسى، جەتىستىكتەرى مەن الداعى جوسپارلارى تۋرالى ايتىپ بەردى، دەپ حابارلايدى "ادىرنا".
ونىڭ ايتۋىنشا، ۇلتتىق پارك 1996 جىلى 164 مىڭ گەكتار جەرمەن قۇرىلعان بولسا، بۇگىندە ەرەكشە قورعالاتىن اۋماق كولەمى 200 مىڭ گەكتاردان اسقان. مۇنى مەملەكەتتىڭ تابيعاتتى قورعاۋ جانە تابيعي مۇرانى ساقتاۋ باعىتىنداعى جۇيەلى جۇمىسىنىڭ ناتيجەسى دەسە بولادى.
– سوڭعى وتىز جىلدا ۇلتتىق پارك اۋماعىندا 5 ميلليوننان استام اعاش كوشەتتەرى وتىرعىزىلدى. ورماندى قالپىنا كەلتىرۋ جانە ەكوجۇيەلەردىڭ تۇراقتىلىعىن ساقتاۋ جۇمىستارى ودان ءارى جالعاسادى، – دەدى ەلنۇر احمەتوۆ.
جۋرناليستەر ۇلتتىق پاركتەگى ءورت قاۋىپسىزدىگى جونىندە سۇرادى.
– بيىل ءورت قاۋىپسىزدىگى شارالارىن كۇشەيتىپ جاتىرمىز. ورتكە قارسى ارنايى جولاقتاردىڭ ۇزىندىعى ەكى مىڭ شاقىرىمنان اسادى، سونىمەن قاتار ءتورت ءورت ءسوندىرۋ ستانتسياسى تاۋلىك بويى جۇمىس ىستەيدى. پارك اۋماعىندا 41 ءورت ءسوندىرۋشى مامان قىزمەت ەتەدى، – دەدى ۇلتتىق پارك باسشىسى.
ءوز كەزەگىندە ەلنۇر احمەتوۆ ەكولوگيالىق تۋريزم سالاسىنداعى ينۆەستيتسيالىق جوبالاردىڭ ءتيىمدى جۇزەگە اسىپ جاتقانى دا تىلگە تيەك ەتتى.
– وتىز جىل بۇرىن ءبىر عانا ينۆەستيتسيالىق جوبا ىسكە اسىرىلسا، قازىر ولاردىڭ سانى 94-كە جەتتى. بۇل – ءوڭىردىڭ تۋريستىك الەۋەتىن ارتتىرىپ، تۇراقتى ەكولوگيالىق ءتۋريزمدى دامىتۋعا جاسالعان ۇلكەن قادام. الداعى ءۇش جىلدا تاعى 30 جاڭا تۋريستىك باعىت اشۋدى جوسپارلاپ وتىرمىز، – دەدى ەلنۇر احمەتوۆ.
سونىمەن قاتار، ۇلتتىق پاركتىڭ عىلىمي زەرتتەۋلەر مەن بيوالۋانتۇرلىلىكتى ساقتاۋ باعىتىنداعى جۇمىستارى دا بەلسەندى جۇرگىزىلۋدە. باس ديرەكتوردىڭ ويىنشا، تابيعاتتى قورعاۋ شارالارىنىڭ ناتيجەسىندە سوڭعى وتىز جىلدا سيرەك كەزدەسەتىن جانۋارلاردىڭ سانى ايتارلىقتاي ارتقان.
– ماسەلەن، ىلبىستەردىڭ سانى ءتورت ەسەگە جۋىق ءوستى. بۇرىن 10 داراقتان اسپايتىن بولسا، بۇگىندە ولاردىڭ سانى 39-عا جەتتى. بۇل مەملەكەتتىك جانە قوعامدىق دەڭگەيدەگى كەشەندى جۇمىستىڭ ناتيجەسى، – دەپ اتاپ ءوتتى ەلنۇر احمەتوۆ.
ونىڭ ايتۋىنشا، ۇلتتىق پاركتە سيرەك كەزدەسەتىن وسىمدىكتەردى جاساندى ورتادا كوبەيتەتىن زاماناۋي in-vitro زەرتحاناسى اشىلعان. بۇل دا پارك جۇمىسىنىڭ عىلىمي الەۋەتىن كورسەتەدى.
جالپى، ىلە-الاتاۋى ۇلتتىق پاركى تابيعاتتى قورعاۋمەن قاتار، تۇراقتى ەكولوگيالىق ءتۋريزمدى دامىتۋ مەن ەكولوگيالىق مادەنيەتتى ارتتىرۋعا ۇلكەن ۇلەس قوسۋدا.
