تالدىقورعان قالاسىنىڭ باس جوسپارىن بەكىتىلدى.
وندا قالا ەكونوميكاسىندا بولاشاقتا بالامالى ەنەرگەتيكا، جاڭا ماتەريالدار، بيومەديتسينا، جاساندى ينتەللەكت، بلوكچەين سياقتى بىرقاتار باعىتتاردى دامىتۋعا باسىمدىق بەرىلەتىنى كورسەتىلگەن. وسى ورايدا باستى ماقسات - حالىقتىڭ جۇمىسپەن قامتىلۋ دەڭگەيىن، ءال-اۋقاتىن، ەكولوگيالىق تۇرمىس جاعدايلارىن جاقسارۋ ارقىلى ادامي الەۋەتتى نىعايتۋ.
باس جوسپارعا تۇزەتۋ ەنگىزۋ وبلىس اكىمىنىڭ تاپسىرماسى بويىنشا جاسالدى. جالپى بۇل جاڭا جوسپار قالا اۋماعىن قۇرىلىس تۇرعىسىنان دامىتۋ ستراتەگياسىن، قوعامدىق قىزمەت كورسەتۋ جۇيەسىن، كولىكتىك جانە ينجەنەرلىك ينفراقۇرىلىمدى دامىتۋ، اۋماقتى اباتتاندىرۋ، سونداي-اق تاريحي-مادەني مۇرا وبەكتىلەرى مەن قورشاعان ورتانى قورعاۋ شارالارىن ايقىندايدى.
وبلىستىق ساۋلەت جانە قالاقۇرىلىس باسقارماسىنىڭ مالىمەتىنە قاراعاندا، جاڭارعان باس جوسپاردا ەكونوميكالىق دامۋمەن قاتار، قالانىڭ 2050 جىلعا دەيىنگە جوسپارلانعان دامۋ اۋماعىنا سايكەس ەڭ الدىمەن قوعامدىق-ىسكەرلىك، وندىرىستىك، رەكرەاتسيالىق، تۇرعىن ايماقتاردى، سونداي-اق ينجەنەرلىك-كولىك ينفراقۇرىلىمى ايماقتارىن كەشەندى تۇردە جوسپارلاۋ كوزدەلگەن. اتالعان كەزەڭگە قاراي قالا تۇرعىندارىنىڭ سانى 300 مىڭعا دەيىن وسەدى دەگەن بولجام بار.
- قالا حالقى سانىنىڭ ارتۋىنا قاراي تۇرعىن ءۇي قورىنىڭ كولەمى دە ارتادى. اتالعان مەرزىمدە تۇرعىن ءۇي قورى 9086,9 ىڭ شارشى مەترگە دەتەدى دەپ بولجانىپ وتىر. ال الەۋمەتتىك سالا ينفراقۇرىلىمدى دامىتۋ باعىتىندا بىرنەشە بالاباقشا، مەكتەپ، ەمحانا سالۋ كوزدەلگەن. بۇدان بولەك، ونكولوگيالىق ديسپانسەر سالىنىپ، پسيحونەۆرولوگيالىق ينتەرنات سالۋ ۇسىنىلادى، - دەيدى وبلىستىق ساۋلەت جانە قالاقۇرىلىس باسقارماسىنىڭ ءبولىم باسشىسى ءاسانالى جاڭاباي.
بۇل رەتتە كولىك جەلىسى دە نازاردان تىس قالعان جوق، سونداي-اق سۋ، گاز، جىلۋ، ەلەكترمەن جابدىقتاۋ جانە سۋ بۇرۋ جۇيەلەرىن قامتيتىن تۇرعىن ءۇي-كوممۋنالدىق شارۋاشىلىعىن ودان ءارى دامىتۋ كوزدەلگەن. سونداي-اق تەلەكوممۋنيكاتسيا سالاسىن دامىتۋ، اۋماقتاردى ينجەنەرلىك قورعاۋ جانە قالانىڭ سانيتارلىق جاعدايىن جاقسارتۋ شارالارى دا جوسپارلانعان. ونىڭ ىشىندە تۇرمىستىق قاتتى قالدىقتاردى بولەك جيناۋدى كەڭىنەن ناسيحاتتاۋ دا قاراستىرىلعان.
