رەسەيدىڭ بانك سەكتورىندا جالپى پايدا ازايىپ جاتقان كەزەڭدە ءبىر قارجى ۇيىمى كەرىسىنشە ءوسۋ كورسەتىپ وتىر. «ازياتسكو تيحووكەانسكي بانك» (اتب), قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ قورلارىمەن بايلانىستى دەلىنەتىن قۇرىلىم، سوڭعى جىلدارى تازا تابىسىن بىرنەشە ەسەگە كوبەيتىپ، ەلدەگى ەڭ ءىرى 30 بانكتىڭ قاتارىنا ەندى. بۇل تۋرالى «ۆىحود ك موريۋ» تەلەگرام ارناسى جازدى، دەپ حابارلايدى “ادىرنا”.
رەسەي بويىنشا بانك پايداسى ورتا ەسەپپەن 8 پايىزعا تومەندەگەنىنە قاراماستان، اتب ءوسىم كورسەتكەن. سوڭعى 5 جىل ىشىندە بانكتىڭ تازا پايداسى 1,5 ملرد رۋبلدەن 16 ملرد رۋبلگە دەيىن جەتكەن. بۇل شامامەن 102 ملرد تەڭگەگە تەڭ، ياعني كورسەتكىش قازاقستاندىق نارىقپەن سالىستىرعاندا دا ايتارلىقتاي جوعارى.
بانكتىڭ اكتيۆتەرى دە ايتارلىقتاي ۇلعايعان: 5 جىل بۇرىن 134,5 ملرد رۋبل بولسا، قازىر 338 ملرد رۋبلگە جەتكەن. وسى ءوسۋ ناتيجەسىندە اتب رەسەيدەگى ەڭ ءىرى 30 بانكتىڭ قاتارىنا كىردى.
سانكتسيالىق ماسەلەگە كەلەر بولساق، قازىرگى ۋاقىتتا بانك حالىقارالىق Raiffeisen, OTP Group, Citigroup جانە UniCredit توپتارىنىڭ ەنشىلەس ۇيىمدارى سياقتى ەشبىر سانكتسيالىق تىزىمگە ەنگىزىلمەگەن. 2025 جىلدىڭ قاڭتارىندا ەۋروپا وداعىنىڭ سانكتسيالىق پاكەتتەرىنە ەنگىزىلۋى مۇمكىن دەپ ايتىلعانىمەن، سوڭعى شەشىمدە اتب پەن «موسكوممەرتسبانك» شەكتەۋلەردەن تىس قالعان.
2018 جىلى رەسەيدىڭ ورتالىق بانكى اتب-نى قارجى پيراميداسىن قۇردى دەپ ايىپتاپ، ساناتسيا رەجيمىنە اۋىستىرعان. سول كەزدەگى يەسى اندرەي ۆدوۆينگە ايىپ تاعىلىپ، ول ەلدەن كەتكەن.
سيتۋاتسيا 2021 جىلى وزگەردى. رەسەي ورتالىق بانكى بانكتىڭ 100 پايىز اكتسياسىن Pioneer Capital Invest كومپانياسىنا 14 ملرد رۋبلگە ساتتى. بۇل كومپانيا قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ قورلارىمەن بايلانىستىرىلعان. كەيىن بانكتىڭ قۇرىلىمى كەڭەيىپ، قۇرامىنا «كۆانت موبايل بانك» قوسىلدى.
