قازاقستاندىق مانەرلەپ سىرعاناۋشى ميحايل شايدوروۆ يتاليادا ءوتىپ جاتقان وليمپيادا ويىندارىندا التىن مەدالدى جەڭىپ الدى, دەپ حابارلايدى «ادىرنا» ءتىلشىسى.
ول مانەرلەپ سىرعاناۋدان ەل قورجىنىنا العاشقى مەدالدى سالدى. الەم چەمپيوناتىنىڭ كۇمىس جۇلدەگەرى ءوزىنىڭ ەركىن باعدارلاماسىندا رەكوردتىق 198.64 ۇپاي جينادى. جارىس بارىسىندا وتانداسىمىز ءبىرىنشى مارتە 5 رەت تورتتىك سەكىرۋ ەلەمەنتىن ءساتتى ورىنداي الدى.
تۋريزم جانە سپورت ءمينيسترى ەربول مىرزابوسىنوۆ ميحايل شايدوروۆتى تاريحي جەتىستىگىمەن قۇتتىقتادى.
«ميحايل شايدوروۆتى وليمپيادانىڭ چەمپيونى اتانۋىمەن شىن جۇرەكتەن قۇتتىقتايمىن. بۇل — تالاي جىلعى تىنىمسىز ەڭبەك پەن تاباندىلىقتىڭ، العا قويعان ماقساتقا دەگەن سەنىمنىڭ جەمىسى. بۇگىن ميحايل ەلگە زور قۋانىش سىيلاپ، وتاندىق مانەرلەپ سىرعاناۋشىلاردىڭ الەمدىك دەڭگەيدە باسەكەگە قابىلەتتى ەكەنىن دالەلدەدى. بۇل جەتىستىك جاس سپورتشىلارعا شابىت بەرىپ، ەلىمىزدە قىسقى سپورت تۇرلەرىنىڭ دامۋىنا جاڭا سەرپىن بەرەدى»،- دەدى ول.
ءتۋرنيردىڭ قورىتىندىسى بويىنشا جاپونيالىقتار يۋما كاگياما 2-ورىندى، شۋن ساتو 3-ورىندى يەلەندى.
بۇعان دەيىن مانەرلەپ سىرعاناۋدان 2014 جىلى سوچي وليمپياداسىنىڭ دەنيس تەن قولا جۇلدە العان ەدى.
ايتا كەتەيىك، قازاقستان اتىنان وليمپيادانىڭ التىن جۇلدەسىن سوناۋ 1994 جىلى ليللەحاممەر وليمپياداسىندا شاڭعىشى ۆلاديمير سميرنوۆ العان ەدى.
