جامبىل وبلىسىندا 36 جاستاعى ايەل بەسىنشى قاباتتان ەكى بالاسىن لاقتىرىپ جىبەردى. قايعىلى وقيعا تولە بي داڭعىلىنداعى جاتاقحانالاردىڭ بىرىندە بولعان. اقپاراتتى وبلىستىق پوليتسيا دەپارتامەنتى راستادى، دەپ حابارلايدى "ادىرنا".
اقپاراتقا سايكەس، ايەل 2021 جىلى تۋعان قىزى مەن 2023 جىلعى ۇلىن تەرەزەدەن لاقتىرىپ جىبەرگەن. ابىروي بولعاندا ەكى بالا دا امان قالدى. ولار جامبىل وبلىستىق كوپبەيىندى بالالار اۋرۋحاناسىنا شۇعىل جەتكىزىلدى. قازىرگى ۋاقىتتا بالالار ينتەنسيۆتى تەراپيا بولىمشەسىندە جاتىر.
وبلىستىق دەنساۋلىق ساقتاۋ باسقارماسىنىڭ مالىمەتىنشە، 2021 جىلى تۋعان بالا جابىق باس مي جاراقاتىن العان، ميى قاتتى ىسىنگەن، جامباس سۇيەگى سىنىپ، سۇيەك بولشەكتەرىنىڭ ورنى اۋىسىپ كەتكەن. بالاعا ىسىنۋدى ازايتاتىن ەم تاعايىندالعان. ۆەدومستۆو ەرتەڭ جامباس بولىگىنە وتا جاسالاتىنىن مالىمدەدى.
2023 جىلى تۋعان بالا دا جابىق باس مي جاراقاتىن الىپ، ميىڭ قاتتى ىسىنگەن.
پوليتسيا دەپارتامەنتى اتالعان فاكتى بويىنشا سوتقا دەيىنگى تەرگەۋ باستالعانىن مالىمدەدى.
«كۇدىكتى ۇستالىپ، ۋاقىتشا ۇستاۋ يزولياتورىنا قامالدى. ەكى كامەلەتكە تولماعان بالا اۋرۋحاناعا جەتكىزىلدى. قازىرگى ۋاقىتتا بارلىق قاجەتتى تەرگەۋ شارالارى جۇرگىزىلۋدە. جان-جاقتى جانە وبەكتيۆتى تەرگەپ-تەكسەرۋ ناتيجەسى بويىنشا قر زاڭناماسىنىڭ تالاپتارىنا ساي پروتسەسسۋالدىق شەشىم قابىلدانادى. قر قپك 201-بابىنا سايكەس، باسقا مالىمەتتەر جاريالاۋعا جاتپايدى»، – دەپ حابارلادى تاراز قالاسى پد ءباسپاسوز قىزمەتى.
