اقش يرانمەن وتكەن كەلىسسوزدەردىڭ جاڭا كەزەڭىنەن كەيىن بىرنەشە ساعات ىشىندە تەگەرانعا قارسى جاڭا سانكتسيالار ەنگىزدى، دەپ حابارلايدى "ادىرنا" ۇلتتىق پورتالى سۆوبودنىي يران تەلەگرام ارناسىنا سىلتەپ.
اقش مەملەكەتتىك دەپارتامەنتىنىڭ مالىمەتىنشە، سانكتسيالار زاڭسىز يران مۇنايى، مۇناي ونىمدەرى جانە مۇناي-حيميا ونىمدەرىنىڭ ساۋداسىنا قاتىسى بار دەپ ەسەپتەلەتىن «كولەڭكەلى فلوتقا» كىرەتىن 15 ۇيىم مەن 14 مۇناي تانكەرىنە قاتىستى ەنگىزىلگەن.
سونىمەن قاتار يران مۇنايىن تاسىمالداۋ مەن ەكسپورتتاۋعا قاتىسى بار تاعى 15 ۇيىم مەن ەكى جەكە تۇلعا دا سانكتسيالىق تىزىمگە ەنگىزىلدى.
اقش مەملەكەتتىك دەپارتامەنتىنىڭ رەسمي وكىلى تەممي پيگوتت مالىمدەمەسىندە اقش پرەزيدەنتى دونالد ترامپ يرانعا قاتىستى «ماكسيمالدى قىسىم» ساياساتى اياسىندا ەلدىڭ زاڭسىز مۇناي ەكسپورتىن ازايتۋعا باعىتتالعان شارالاردى جالعاستىراتىنىن اتاپ ءوتتى.
اقش تاراپى بۇل شارالار يراننىڭ مۇناي ەكسپورتى ارقىلى تۇسەتىن كىرىستەرىن شەكتەۋگە باعىتتالعانىن ايتتى.
