اقش پەن يراندى سەگىز ايدان كەيىن قايتا ءبىر ۇستەل باسىنا جيناعان يادرولىق باعدارلاما جونىندەگى كەلىسسوزدەردىڭ العاشقى كەزدەسۋى اياقتالدى. يراننىڭ مەملەكەتتىك تەلەارناسى ومان استاناسى ماسكاتتا وتكەن كەلىسسوزدەردىڭ «ازىرگە» اياقتالعانىن، ال ەكى ەل دەلەگاتسيالارىنىڭ ءوز ەلدەرىنە ورالۋى كۇتىلەتىنىن مالىمدەدى، دەپ حابارلايدى “ادىرنا”.
الەم جۇرتشىلىعى نازار اۋدارعان اقش پەن يران اراسىنداعى كەلىسسوزدىڭ العاشقى سەسسياسى وسىلايشا اياقتالدى.
جاناما كەلىسسوزگە ومان ارااعايىن بولدى. جيىن ماسكات قالاسىندا ومان سىرتقى ىستەر ءمينيسترى ءبادر بين حاماد ءال-ءبۋسايديدىڭ توراعالىعىمەن ءوتتى. يران دەلەگاتسياسىن سىرتقى ىستەر ءمينيسترى ابباس اراكچي، ال اقش دەلەگاتسياسىن اقش پرەزيدەنتىنىڭ تاياۋ شىعىس جونىندەگى ارنايى وكىلى ستيۆ ۋيتكوفف باسقاردى.
كەلىسسوزدەرگە يران تاراپىنان سىرتقى ىستەر ءمينيسترىنىڭ ساياسي ماسەلەلەر جونىندەگى ورىنباسارى مادجيد تاحت-راۆانچ، ەكونوميكالىق ماسەلەلەر جونىندەگى ورىنباسارى حاميد كانبەري جانە سىرتقى ىستەر مينيسترلىگىنىڭ ءباسپاسوز حاتشىسى يسمايل بەكاي قاتىستى. اقش تاراپىنان ۋيتكوففتان بولەك، پرەزيدەنت دونالد ترامپتىڭ كۇيەۋ بالاسى ءارى كەڭەسشىسى دجارەد كۋشنەر دە بولدى.
يران مەملەكەتتىك تەلەارناسىنىڭ ءتىلشىسى ءسىم ءباسپاسوز حاتشىسى يسمايل بەكايدىڭ «كەلىسسوزدەر ازىرگە اياقتالدى، ەكى ەل دەلەگاتسيالارىنىڭ ءوز مەملەكەتتەرىنە ورالۋى كۇتىلەدى» دەگەن ءسوزىن جەتكىزدى.
