پاكىستاننىڭ JF-17 Thunder جويعىش ۇشاقتارىنىڭ تانىمالدىلىعى ارتىپ كەلەدى. بۇل تۋرالى امەريكالىق Muslim Network TV تەلەارناسى مالىمدەدى، دەپ حابارلايدى «ادىرنا» ءتىلشىسى.
JF-17 ۇشاعىن پاكىستان مەن قىتاي بىرلەسىپ ازىرلەگەن. ول قازىرگى ۋاقىتتا كامرا قالاسىنداعى پاكىستان اۆياتسيالىق كەشەنىندە (PAC) وندىرىلۋدە. قازىرگى ۋاقىتتا جىل سايىن 20 ۇشاق شىعارىلادى.
«پاكىستان كەمىندە بەس ەلدىڭ JF-17 Thunder جويعىش ۇشاقتارىنا دەگەن قىزىعۋشىلىعى كۇرت وسكەنىن حابارلادى جانە بۇل سۇرانىس قازىرگى وندىرىستىك قۋاتتىلىقتى اسىپ كەتۋى مۇمكىن. بۇل قىزىعۋشىلىق يسلاماباد 2025 جىلعى مامىردا نيۋ-دەليمەن قاقتىعىس كەزىندە قىتايمەن بىرلەسىپ ازىرلەگەن وسى ۇشاقتىڭ سيپاتتامالارىن كورسەتكەننەن كەيىن پايدا بولعان. سوڭعى اپتالاردا JF-17 ۇشاعىنا يراك، بانگلادەش جانە يندونەزيا قىزىعۋشىلىق تانىتتى. Reuters اگەنتتىگى ساۋد ارابياسى مەن ليۆيا دا ونى ساتىپ الۋ مۇمكىندىگىن قاراستىرىپ جاتقانىن جازدى»،-دەلىنگەن حابارلامادا.
سينگاپۋرداعى س. رادجاراتنام اتىنداعى حالىقارالىق زەرتتەۋلەر مەكتەبىنىڭ عىلىمي قىزمەتكەرى مانودج ءحاردجانيدىڭ ايتۋىنشا، JF-17 ءوزىنىڭ قولجەتىمدىلىگى مەن سوعىس تاجىريبەسىنىڭ ارقاسىندا نارىقتىق تەڭگەرىمدى بۇزاتىن فاكتور بولىپ وتىر.
«باتىس وندىرىسىندەگى جويعىش ۇشاقتاردى الا المايتىن ەلدەردىڭ اۋە كۇشتەرى ونى بەلسەندى تۇردە ساتىپ الادى »،-دەدى حاردجاني.
Muslim Network TV مالىمەتىنشە، پاكىستان مەن ساۋد ارابياسى ءوزارا قورعانىس پاكتىنە قول قويعاننان كەيىن بىرنەشە اي وتكەن سوڭ ساۋديانىڭ شامامەن 2 ميلليارد دوللارلىق كرەديتىن JF-17 ساتىپ الۋعا اينالدىرۋ مۇمكىندىگىن تالقىلاعان. ودان بولەك، بانگلادەشپەن دە JF-17 جويعىشتارىن جانە Super Mushshak وقۋ-جاتتىعۋ ۇشاقتارىن ساتۋعا قاتىستى جەكە كەلىسسوزدەر جۇرگىزگەن.
ليۆيا دا الەۋەتتى ساتىپ الۋشىلاردىڭ قاتارىندا. پاكىستان ليۆيا ۇلتتىق ارمياسىمەن 4 ملرد دوللارلىق قارۋ-جاراق جەتكىزۋ كەلىسىمىنە قول قويعان. يندونەزيالىق قورعانىس دەلەگاتسياسى دا اۆياتسيا سالاسىنداعى، ونىڭ ىشىندە JF-17 جونىندەگى ىنتىماقتاستىقتى تالقىلاۋ ءۇشىن پاكىستان اۋە كۇشتەرى باسشىسىمەن كەزدەسكەن.
JF-17 – جەڭىل كوپماقساتتى جويعىش ۇشاق. ونى 1999 جىلعى كەلىسىم اياسىندا PAC جانە قىتايدىڭ AVIC Chengdu كومپانياسى بىرلەسىپ ازىرلەگەن. ەلدىڭ قورعانىس ءوندىرىسى ءمينيسترى رازا حايات حاررادج ۇشاقتىڭ قۇنى موديفيكاتسيا مەن جەكە باپتاۋلارعا بايلانىستى 40–50 ميلليون دوللار ەكەنىن ايتتى. قازىرگى تاڭدا بۇل باعا ونىڭ باستى ارتىقشىلىعى بولىپ وتىر. ويتكەنى ۇشاق Rafale نەمەسە F-16 سياقتى باتىس انالوگتارىنىڭ ءبىر داناسىنىڭ 100 ميلليون دوللاردان اساتىن باعاسىمەن سالىستىرعاندا ايتارلىقتاي ارزان.
بۇگىندە JF-17 تەك ميانما، نيگەريا جانە ازەربايجانعا ەكسپورتتالعان. نەيپيدو 2015 جىلى كەم دەگەندە 16 ۇشاققا تاپسىرىس بەرگەن، ابۋدجا 2021 جىلى ءۇش ۇشاق السا، باكۋ 2024 جىلى 40 ۇشاق ساتىپ العان. ازەربايجان وتكەن جىلدىڭ قاراشاسىندا جەڭىس كۇنىنە ارنالعان پارادتا بەس JF-17 ۇشاعىن كورسەتكەن بولاتىن.
جاڭا الەۋەتتى تاپسىرىستار وندىرىستىك قۋاتتى ايتارلىقتاي ارتتىرۋدى تالاپ ەتەدى. اقپاراتتارعا سايكەس، ليۆيا مەن بانگلادەش شامامەن 16 ۇشاقتى، ساۋد ارابياسى 50 جويعىشتى، ال يندونەزيا 40 ۇشاقتى ساتىپ الۋدى قاراستىرۋدا.
