پاكىستان اسكەري-اۋە كۇشتەرىنە تيەسىلى وقۋ-جاتتىعۋ ۇشاعى ەلدىڭ سولتۇستىك-باتىسىنداعى حايبەر-پاحتۋنحۆا پروۆينتسياسىندا اپاتقا ۇشىرادى. قايعىلى وقيعا سالدارىنان ۇشاق بورتىندا بولعان ەكى ۇشقىش قازا تاپتى. بۇل تۋرالى سينحۋا اگەنتتىگى جازدى، دەپ حابارلايدى "ادىرنا".
اقپاراتقا سايكەس، اۋە كەمەسى جوسپارلى وقۋ-جاتتىعۋ ۇشۋىن ورىنداپ جۇرگەن كەزدە ماردان وكرۋگىندەگى تۇرعىن ۇيلەرگە قۇلاعان. اپات ناتيجەسىندە جەرگىلىكتى ءۇش تۇرعىن ءتۇرلى دارەجەدەگى جاراقات العان.
وقيعا ورنىنا قۇتقارۋ قىزمەتتەرى مەن توتەنشە جاعدايلار بولىمدەرىنىڭ ماماندارى جەدەل تۇردە جەتىپ، ىزدەستىرۋ-قۇتقارۋ جۇمىستارىن جۇرگىزۋدە. زارداپ شەككەندەرگە قاجەتتى مەديتسينالىق كومەك كورسەتىلگەن.
قازىرگى ۋاقىتتا اپاتتىڭ ناقتى سەبەپتەرى مەن ءمان-جايىن انىقتاۋ ءۇشىن ارنايى تەرگەۋ باستالدى. ازىرگە ۇشاقتىڭ قۇلاۋىنا نە سەبەپ بولعانى تۋرالى رەسمي اقپارات جاريالانعان جوق.
جەرگىلىكتى بيلىك پەن اسكەري ۆەدومستۆو وكىلدەرى وقيعاعا قاتىستى قوسىمشا مالىمەتتەر تەرگەۋ ناتيجەلەرى بويىنشا حابارلاناتىنىن مالىمدەدى.
