اكەلەردىڭ بالا كۇتىمىنە بايلانىستى دەمالىسى زەينەتاقى تاعايىنداۋ كەزىندە ەڭبەك وتىلىنە ەسەپتەلەدى. بۇل تۋرالى بۇگىن، 4 اقپاندا ءماجىلىستىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«قابىلدانعان زاڭ اياسىندا كامەلەت جاسىنا تولماعان بالالارعا ناقتى كۇتىم جاساعان ۋاقىت ەندى جۇمىس ىستەمەيتىن اكەلەردىڭ جاسىنا بايلانىستى زەينەتاقى تولەمدەرىن تاعايىنداۋ كەزىندە ەڭبەك وتىلىنە ەسەپتەلەتىن بولادى. ءتيىستى ناقتىلاۋلار كونستيتۋتسيالىق سوتتىڭ نورماتيۆتىك قاۋلىسىن ىسكە اسىرۋ ماقساتىندا الەۋمەتتىك كودەكسكە ەنگىزىلەدى»،-دەلىنگەن حابارلامادا.
سونىمەن قاتار دەپۋتاتتاردىڭ ۇسىنىسى بويىنشا جۇمىس بەرۋشىنىڭ باستاماسىمەن جالعىزباستى اتا-انالارعا (جىنىسىنا قاراماستان) قاتىستى ەڭبەك شارتىن بۇزۋعا تىيىم سالىنادى. وسىعان بايلانىستى «جالعىزباستى انالار» ۇعىمى «جالعىزباستى اتا-انا» دەپ وزگەرتىلەدى.
بۇدان بولەك، ءماسليحاتتاردىڭ قۇزىرەتى تيپتىك ەرەجەلەر نەگىزىندە «وبلىستىڭ (قالانىڭ، اۋداننىڭ) قۇرمەتتى ازاماتى» اتاعىن بەرۋ قاعيدالارىن ازىرلەۋ جانە بەكىتۋ بويىنشا تولىقتىرىلادى.
