يندونەزيانىڭ باتىس ياۆا پروۆينتسياسىندا بولعان كوشكىن سالدارىنان قازا تاپقانداردى ىزدەۋ-قۇتقارۋ جۇمىستارى سەگىزىنشى كۇنگە ۇلاستى. قازىرگى ۋاقىتتا 70 ادامنىڭ ءمايىتى تابىلدى. بۇل تۋرالى Xinhua اگەنتتىگى جازدى، دەپ حابارلايدى “ادىرنا”.
Detik.com باسىلىمىنىڭ مالىمەتىنشە، باندۋنگ قالاسىنىڭ ىزدەستىرۋ-قۇتقارۋ باسقارماسىنىڭ باسشىسى ادە ديان پەرمانا اۋا رايىنىڭ اشىق بولۋى قۇتقارۋ وپەراتسياسىنا قولايلى جاعداي جاساپ وتىرعانىن ايتتى. ونىڭ سوزىنشە، مايىتتەر بىرنەشە اۋماقتان انىقتالعان.
كوشكىندەر وتكەن سەنبى كۇنى تاڭەرتەڭ باتىس باندۋنگ وكرۋگىنە قاراستى چيسارۋا اۋدانىندا بولعان. قازىرگى تاڭدا 10 ادام حابار-وشارسىز كەتكەندەر قاتارىندا قالىپ وتىر.
جەرگىلىكتى ۋاقىت بويىنشا سەنبى كۇنى ساعات 14:30-داعى مالىمەتكە سايكەس، بيلىك 52 قازا تاپقان ادامنىڭ جەكە باسىن انىقتاعان، ال قالعان مايىتتەرگە ساراپتاما جۇرگىزىلىپ جاتىر. ىزدەستىرۋ جۇمىستارى جالعاسۋدا. قۇتقارۋ توپتارى قاۋىپسىزدىك تالاپتارىن قاتاڭ ساقتاي وتىرىپ، جاعدايعا بايلانىستى تاكتيكالارىن وزگەرتىپ وتىرعانىن اتاپ ءوتتى پەرمانا.
ايتا كەتەيىك، يندونەزيادا ادەتتە قازاننان ناۋرىزعا دەيىن سوزىلاتىن جاڭبىرلى ماۋسىم كەزىندە سۋ تاسقىنى مەن كوشكىندەر ءجيى تىركەلەدى.
بۇعان دەيىن ياۆا ارالىندا بولعان كوشكىن سالدارىنان 25 ادامنىڭ قازا تاپقانى حابارلانعان ەدى.
