فوتو: انادولۋ
يراننىڭ بىرنەشە قالاسىندا 31 قاڭتار كۇنى جارىلىستار بولدى. بۇل تۋرالى جەرگىلىكتى بۇقارالىق اقپارات قۇرالدارى جازدى، دەپ حابارلايدى “ادىرنا”.
سونىڭ ءبىرى ەلدىڭ وڭتۇستىگىندە، پارسى شىعاناعى جاعالاۋىندا ورنالاسقان پورتتى بەندەر-ابباس قالاسىندا تىركەلگەن.
مەملەكەتتىك تەلەارنانىڭ مالىمەتىنشە، مواللەم بۋلۆارى اۋدانىنداعى سەگىز قاباتتى عيماراتتا بولعان جارىلىس سالدارىنان ەكى قابات قيراپ، بىرنەشە اۆتوكولىك پەن دۇكەندەرگە زاقىم كەلگەن. جارىلىستىڭ ناقتى سەبەبى ازىرگە انىقتالعان جوق. وقيعا ورنىنا قۇتقارۋ جانە ءورت ءسوندىرۋ قىزمەتتەرى جىبەرىلدى.
يراننىڭ Tasnim اگەنتتىگىنىڭ حابارلاۋىنشا، جارىلىس سالدارىنان ءبىر ادام قازا تاۋىپ، تاعى 14 ادام جارالانعان.
Mehr اگەنتتىگى يراننىڭ وڭتۇستىك-باتىسىنداعى احۆاز قالاسىندا دا تۇرعىن ءۇي كەشەنىندە جارىلىس بولعانىن حابارلادى. راستالماعان دەرەكتەرگە سايكەس، ءتورت ادام قازا تاپقان. قالالىق ءورت ءسوندىرۋ-قۇتقارۋ قىزمەتىنىڭ باسشىسى وقيعانىڭ سەبەبى گازدىڭ اعىپ كەتۋى بولعانىن مالىمدەدى.
سونىمەن قاتار بۇقارالىق اقپارات قۇرالدارىندا پاراند جانە تەبريز قالالارىندا دا جارىلىستار بولعانى تۋرالى اقپارات تارادى. الايدا بۇل مالىمەتتەرگە قاتىستى ازىرگە رەسمي راستاۋ جوق.
الەۋمەتتىك جەلىلەردە بەندەر-ابباس قالاسىندا يران يسلام رەۆوليۋتسياسى ساقشىلار كورپۋسىنىڭ (كسير) اسكەري-تەڭىز كۇشتەرىنىڭ قولباسشىسى اليرەزا تانگسيريگە قاستاندىق جاسالدى دەگەن قاۋەسەتتەر تارادى. الايدا يراندىق بۇقارالىق اقپارات قۇرالدارى بۇل اقپاراتتى جوققا شىعاردى.
«اقپاراتتان حاباردار دەرەككوز بەندەر-ابباستاعى وقيعا كەزىندە مۇنداي قاستاندىق بولماعانىن راستادى»، — دەپ حابارلادى Mehr اگەنتتىگى. وسىنداي مالىمەتتى Tasnim اگەنتتىگى دە ءوز دەرەككوزىنە سىلتەمە جاساپ تاراتتى.
سونىمەن بىرگە ءيزرايلدىڭ رەسمي تۇلعالارى يرانداعى جارىلىستارعا ءيزرايلدىڭ ەشقانداي قاتىسى جوق ەكەنىن مالىمدەدى. بۇل تۋرالى ءيزرايلدىڭ 12-ارناسى حابارلادى.
جارىلىستاردان بىرنەشە ساعات بۇرىن، اقش-پەن اراداعى شيەلەنىستىڭ كۇشەيۋىنە بايلانىستى، يران قارۋلى كۇشتەرى «تولىق قورعانىس جانە جاۋىنگەرلىك دايىندىق» رەجيمىنە كوشىرىلگەنى حابارلانعان ەدى. قۇرلىق اسكەرلەرىنىڭ قولباسشىسى امير ءحاتاميدىڭ ايتۋىنشا، «ەگەر جاۋ قاتەلىككە جول بەرسە، بۇل ونىڭ ءوز قاۋىپسىزدىگىنە، ايماقتىڭ جانە سيونيستىك رەجيمنىڭ قاۋىپسىزدىگىنە قاتەر توندىرەدى».
ۆاشينگتون مەن تەگەران اراسىنداعى شيەلەنىس اقش پرەزيدەنتى دونالد ترامپتىڭ سوڭعى مالىمدەمەلەرىنەن كەيىن كۇشەيە ءتۇستى. 30 قاڭتاردا ول يران يادرولىق باعدارلاماسى بويىنشا جاڭا كەلىسىمنەن باس تارتقان جاعدايدا، جاڭا اسكەري سوققىلار بولۋى مۇمكىن ەكەنىن ەسكەرتتى.
«ەگەر كەلىسىم بولماسا — نە بولاتىنىن كورەرمىز»، — دەگەن ترامپ يران جاعالاۋلارىنا قوسىمشا اسكەري كەمەلەر جىبەرىلگەنىن دە راستادى.
