Foto: Anadolu
İrannyŋ bırneşe qalasynda 31 qaŋtar künı jarylystar boldy. Būl turaly jergılıktı būqaralyq aqparat qūraldary jazdy, dep habarlaidy “Adyrna”.
Sonyŋ bırı eldıŋ oŋtüstıgınde, Parsy şyǧanaǧy jaǧalauynda ornalasqan portty Bender-Abbas qalasynda tırkelgen.
Memlekettık telearnanyŋ mälımetınşe, Moallem bulvary audanyndaǧy segız qabatty ǧimaratta bolǧan jarylys saldarynan ekı qabat qirap, bırneşe avtokölık pen dükenderge zaqym kelgen. Jarylystyŋ naqty sebebı äzırge anyqtalǧan joq. Oqiǧa ornyna qūtqaru jäne ört söndıru qyzmetterı jıberıldı.
İrannyŋ Tasnim agenttıgınıŋ habarlauynşa, jarylys saldarynan bır adam qaza tauyp, taǧy 14 adam jaralanǧan.
Mehr agenttıgı İrannyŋ oŋtüstık-batysyndaǧy Ahvaz qalasynda da tūrǧyn üi keşenınde jarylys bolǧanyn habarlady. Rastalmaǧan derekterge säikes, tört adam qaza tapqan. Qalalyq ört söndıru-qūtqaru qyzmetınıŋ basşysy oqiǧanyŋ sebebı gazdyŋ aǧyp ketuı bolǧanyn mälımdedı.
Sonymen qatar būqaralyq aqparat qūraldarynda Parand jäne Tebriz qalalarynda da jarylystar bolǧany turaly aqparat tarady. Alaida būl mälımetterge qatysty äzırge resmi rastau joq.
Äleumettık jelılerde Bender-Abbas qalasynda İran İslam revoliusiiasy saqşylar korpusynyŋ (KSİR) äskeri-teŋız küşterınıŋ qolbasşysy Alireza Tangsirige qastandyq jasaldy degen qauesetter tarady. Alaida irandyq būqaralyq aqparat qūraldary būl aqparatty joqqa şyǧardy.
«Aqparattan habardar derekköz Bender-Abbastaǧy oqiǧa kezınde mūndai qastandyq bolmaǧanyn rastady», — dep habarlady Mehr agenttıgı. Osyndai mälımettı Tasnim agenttıgı de öz derekközıne sılteme jasap taratty.
Sonymen bırge İzraildıŋ resmi tūlǧalary İrandaǧy jarylystarǧa İzraildıŋ eşqandai qatysy joq ekenın mälımdedı. Būl turaly İzraildıŋ 12-arnasy habarlady.
Jarylystardan bırneşe saǧat būryn, AQŞ-pen aradaǧy şielenıstıŋ küşeiuıne bailanysty, İran Qaruly küşterı «tolyq qorǧanys jäne jauyngerlık daiyndyq» rejimıne köşırılgenı habarlanǧan edı. Qūrlyq äskerlerınıŋ qolbasşysy Amir Hatamidıŋ aituynşa, «eger jau qatelıkke jol berse, būl onyŋ öz qauıpsızdıgıne, aimaqtyŋ jäne sionistık rejimnıŋ qauıpsızdıgıne qater töndıredı».
Vaşington men Tegeran arasyndaǧy şielenıs AQŞ prezidentı Donald Tramptyŋ soŋǧy mälımdemelerınen keiın küşeie tüstı. 30 qaŋtarda ol İran iadrolyq baǧdarlamasy boiynşa jaŋa kelısımnen bas tartqan jaǧdaida, jaŋa äskeri soqqylar boluy mümkın ekenın eskerttı.
«Eger kelısım bolmasa — ne bolatynyn körermız», — degen Tramp İran jaǧalaularyna qosymşa äskeri kemeler jıberılgenın de rastady.
