قىرعىزستاننىڭ ىستىقكول وبلىسى، جەتى-وگىز اۋدانىندا قار بارىسى قوراداعى مالعا شابۋىل جاسادى، دەپ حابارلايدى "ادىرنا" ۇلتتىق پورتالى.
وقيعا اق-شىيراق اۋىلىندا تىركەلگەن.
اۋىل اكىمى مارس بەرىكباەۆتىڭ مالىمدەۋىنشە، وقيعا 29 قاڭتار كۇنى ءۇش-كوشكون ەلدى مەكەنىنە جاقىن ورنالاسقان قارا-تاي جايلاۋىندا بولعان. جابايى جىرتقىش جەرگىلىكتى تۇرعىن ۇلان باقىتۇلىنا تيەسىلى قوراعا كىرىپ، ءبىر ەشكىگە شابۋىل جاساپ، جانۋاردىڭ دەنەسىندە ءتىس ىزدەرىن قالدىرعان.
قورا يەسى قول شامىنىڭ كومەگىمەن قار بارىسىن ۇركىتكەننەن كەيىن جىرتقىش وقيعا ورنىنان قاشىپ كەتكەن. ادامدار زارداپ شەككەن جوق.
ايتا كەتەيىك، بۇعان دەيىن 25 قاڭتار كۇنى قىتايدىڭ شىڭجاڭ-ۇيعىر اۆتونوميالىق اۋدانىندا قار بارىسى تۋريست ايەلگە شابۋىل جاساعان ەدى.
ۇقساس جاڭالىقتار
