مەملەكەت باسشىسى قاسىم-جومارت توقاەۆ باس پروكۋراتۋراعا بارىپ، قۇزىرلى ورگان وكىلدەرىمەن كەزدەسۋ وتكىزدى. ول ۇكىمەت پەن ۇلتتىق قاۋىپسىزدىگىنە قازاقستاندا جۇرگەن شەتەلدىك ازاماتتاردى باقىلاۋعا الۋدى تاپسىردى. بۇل تۋرالى اقوردا جازدىع دەپ حابارلايدى "ادىرنا".
«قازىر الەمدە كۇردەلى احۋال قالىپتاسىپ وتىر. دۇنيە جۇزىندە كەڭ اۋقىمدى كوشى-قون ءجۇرىپ جاتىر دەسەك، قاتە بولمايدى. قونىس اۋدارعىسى كەلەتىن شەتەلدىكتەر ءۇشىن قازاقستان – باسقا ەلدەرگە وتۋگە دە، تۇراقتاپ قالۋعا دا قولايلى مەملەكەت. ەلگە كەلگەن شەتەل ازاماتتارىن ۋاقتىلى ەسەپكە الىپ، ولاردىڭ ءجۇرىس-تۇرىسىن باقىلايتىن تەحنيكالىق قۇرالداردى جەتىلدىرۋ – اسا ماڭىزدى مىندەت. ۇكىمەتكە ۇلتتىق قاۋىپسىزدىك كوميتەتىمەن بىرلەسىپ، وسى جۇمىستى تەزدەتۋدى تاپسىرامىن، – دەدى ول.
ودان بولەك پرەزيدەنت دەسترۋكتيۆتى كونتەنتتى تاراتاتىن توپتار بار ەكەنىن اتاپ ءوتتى. ولار جي-ءدى تەرىس ماقساتتا پايدالانۋى مۇمكىن ەكەنىن ايتىپ، وعان جول بەرمەۋ كەرەك دەپ ەسكەرتتى.
«قوعامدى جىككە ءبولىپ، ازاماتتاردى ءبىر-بىرىنە قارسى قوياتىن دەسترۋكتيۆتى اقپارات تاراتۋعا بەيىل ادامدار دا بار. مۇنىڭ ءبارى وشپەندىلىككە باستايتىن ەشكىمگە قاجەتسىز، ءتىپتى قاۋىپتى پىكىرتالاسقا جالعاسادى. جاساندى ينتەللەكتىنى وسىنداي ادامدار اقپاراتتىق قارۋعا اينالدىرىپ، زاڭعا قايشى كەلەتىن كونتەنتتەردى كوپتەپ تاراتا باستايدى. بۇعان جول بەرۋگە بولمايدى. ونداي ارەكەتتەرگە قۇقىقتىق باعا بەرىپ، جاۋاپكەرشىلىككە تارتۋ قاجەت. ازاماتتارعا دەسترۋكتيۆتى كونتەنتتى تاراتۋدىڭ قۇقىقتىق سالدارى جونىندە ۇنەمى ءتۇسىندىرۋ جۇمىستارىن جۇرگىزگەن ءجون»، – دەدى قاسىم-جومارت توقاەۆ.
