استانادا «Astana Recycling Plant» كومپانياسىنا باعانى نەگىزسىز كوتەرگەنى ءۇشىن ايىپپۇل سالىندى، دەپ حابارلايدى «ادىرنا» ءتىلشىسى قازتاگ-قا سىلتەمە جاساپ.
ارنايى اكىمشىلىك سوتتىڭ شەشىمىمەن كومپانياعا جالپى سوماسى 54 ملن تەڭگە كولەمىندە ايىپپۇل تولەۋ مىندەتتەلگەن. باسەكەلەستىكتى قورعاۋ جانە دامىتۋ اگەنتتىگى سومانىڭ تولىق وتەلگەنىن جەتكىزدى.
اقپاراتقا سايكەس، بقا دەپارتامەنتى استانا قالاسىنىڭ بايقوڭىر اۋدانى پروكۋراتۋراسىن ۇيلەستىرۋ كەزىندە قاتتى تۇرمىستىق قالدىقتاردى سۇرىپتاۋ جانە قايتا وڭدەۋ بويىنشا قىزمەتتەر سالاسىندا تەرگەۋ جۇرگىزگەن.
«تەرگەۋ بارىسىندا «Astana Recycling Plant» جشس قىزمەتىندە 2023 جىلدىڭ ەكىنشى جارتىجىلدىعىندا قتق قابىلداۋ، سۇرىپتاۋ جانە قايتا وڭدەۋ بويىنشا قىزمەتتەر نارىعىندا مونوپوليالىق جوعارى باعالاردى بەلگىلەۋ فاكتىسى انىقتالدى. قتق قابىلداۋ، سۇرىپتاۋ جانە قايتا وڭدەۋ بويىنشا قىزمەتتەردى كورسەتۋگە بايلانىستى ەمەس شىعىندار كورسەتىلەتىن قىزمەتتەردىڭ وزىندىك قۇنىنا نەگىزسىز جاتقىزىلعانى انىقتالدى»، - دەلىنگەن حابارلامادا.
Kompra مالىمەتتەرىنە سۇيەنسەك، اتالعان كەزەڭدە «Astana Recycling Plant» كاسىپورنىنىڭ جالعىز قۇرىلتايشىسى — «Green Future Management Ltd» جەكە كومپانياسى بولعان. جۋرناليست دميتري شيشكيننىڭ اقپاراتى بويىنشا، بۇل كومپانيانىڭ قۇرىلتايشىسى ءارى جەتەكشىسى رەتىندە ماقسات مولداشوۆ تىركەلگەن. ول ءاليا نازارباەۆانىڭ جانە ونىڭ نەمەرە ءسىڭلىسى كارينا الپىسباەۆانىڭ قۇرىلىمدارىمەن بايلانىستى تۇلعا رەتىندە بەلگىلى. شيشكين بۇعان دەيىن اتاپ وتكەندەي، «Green Future Management Ltd.» كومپانياسى قازاقستاننىڭ ەكس-پرەزيدەنتىنىڭ كەنجە قىزىنا تيەسىلى قوقىس وڭدەۋ جانە كادەگە جاراتۋ بيزنەسىندە جۇيە قۇراۋشى ءرول اتقارعان.
ايتا كەتەيىك، 2023 جىلعى قىركۇيەكتە مينيستر ەرلان نىسانباەۆ كومپانيا قوقىس تاسىمالىمەن اينالىسپايدى دەپ مالىمدەگەن، بىراق كەيىن بۇل اقپارات شىندىققا سايكەس كەلمەيتىنى بەلگىلى بولعان.
