سنەجاننا يماشەۆا: كونستيتۋتسيانىڭ پرەامبۋلاسى — نەگىزگى زاڭنىڭ يدەيالىق-مورالدىق وزەگى

كونستيتۋتسيالىق كوميسسيانىڭ ەكىنشى وتىرىسىندا قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ جونىندەگى ۇسىنىستاردى كەزەڭ-كەزەڭمەن تالقىلاۋ باستالدى. وتىرىستىڭ بارىسىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى سنەجاننا يماشەۆا ءبىرىنشى وتىرىس قورىتىندىسى بويىنشا دايىندالعان سالىستىرمالى كەستەنى تانىستىرىپ، پرەامبۋلا مەن 1–39 باپتاردى جۇيەلى تۇردە قاراۋدى ۇسىندى.
 
ۇسىنىلعان وزگەرتۋلەر كونستيتۋتسيالىق قۇرىلىمنىڭ نەگىزدەرىن ناقتىلاۋ جانە نىعايتۋعا، نورمالاردىڭ قۇقىقتىق انىقتىعىن ارتتىرۋعا، سونداي-اق قۇقىق قورعاۋ مەحانيزمدەرىن كۇشەيتۋگە باعىتتالعانى ايتىلدى. ارنايى نازار پرەامبۋلانىڭ ءمان-ماعىناسىنا جانە قازىرگى الەۋمەتتىك ۇردىستەردى ەسكەرە وتىرىپ، كونستيتۋتسيالىق نورمالاردى جاڭارتۋ قاجەتتىلىگىنە اۋدارىلدى.
 
«كونستيتۋتسيانىڭ پرەامبۋلاسى — بۇل تەك كىرىسپە ەمەس، نەگىزگى زاڭنىڭ يدەيالىق-مورالدىق وزەگى، ماقساتتى ايقىندايتىن جانە مەملەكەتتىڭ دامۋ باعىتىن بەلگىلەيتىن نەگىزگى باعدار»، — دەدى سنەجاننا يماشەۆا.
 
ودان كەيىنگى تالقىلاۋ كونستيتۋتسيانىڭ I جانە II بولىمدەرىندەگى نورمالارعا قاتىستى بولدى، سونىڭ ىشىندە قۇقىقتىق جانە زايىرلى مەملەكەت پرينتسيپتەرىن بەكىتۋ، ادام قادىر-قۇقىعىن، ءومىر ءسۇرۋ قۇقىعىن، جەكە ەركىندىك پەن تۇلعانىڭ قاۋىپسىزدىگىن قورعاۋ، سونداي-اق جەكە ءومىر مەن جەكە دەرەكتەردى قورعاۋ ماسەلەلەرى قارالدى. سونىمەن قاتار كونستيتۋتسيالىق پرينتسيپتەردىڭ نورماتيۆتىك مارتەبەسىن كۇشەيتۋ جانە ولاردىڭ پراكتيكالىق قولدانىلۋىن قامتاماسىز ەتۋ جونىندەگى ۇسىنىستار تالقىلاندى.
 
«ۇسىنىلىپ وتىرعان وزگەرىستەر كونستيتۋتسيالىق نورمالاردىڭ قولدانىلۋ تيىمدىلىگىن ارتتىرۋعا جانە ولاردىڭ تۇسىندىرىلۋىنە ءبىرتۇتاس ءتاسىل قالىپتاستىرۋعا باعىتتالعان»، — دەپ ايتىلدى وتىرىس بارىسىندا.
 
سونىمەن قاتار، ادامي كاپيتالدى، ءبىلىم بەرۋدى، عىلىم مەن مادەنيەتتى دامىتۋ، الەۋمەتتىك كەپىلدىكتەردى كۇشەيتۋ، قورشاعان ورتانى قورعاۋ جانە وتباسىنىڭ قۇقىقتارىن ساقتاۋ سياقتى باستامالار قارالدى. ۇسىنىستاردى قاراۋ كەزەڭ-كەزەڭىمەن جۇزەگە اسىرىلاتىن بولادى جانە كونستيتۋتسيالىق كوميسسيانىڭ كەلەسى وتىرىستارىندا جالعاسادى.