ۇلىتاۋ وبلىسىنداعى جاڭاارقا اۋىلىنىڭ تۋماسى ماناربەك تولەۋ Disney كومپانياسىندا ساۋلەتشى قىزمەتىن اتقارىپ ءجۇر. بۇل تۋرالى Digital Business جازدى، دەپ حابارلايدى «ادىرنا» ءتىلشىسى.
ول ساۋلەت ونەرىنە بالا كەزىنەن قىزىققانىن مالىمدەدى. ايتۋىنشا، اكەسىمەن بىرگە ات قورالار مەن ءتۇرلى شارۋاشىلىق نىساندارىن سالعان. كەڭىستىكتى ءوز قولىمەن جاساۋدى ۇناتقان جاس جىگىت كاسىبي ارحيتەكتور بولۋ ءۇشىن لوس-اندجەلەستەگى وڭتۇستىك كاليفورنيا ۋنيۆەرسيتەتىنە وقۋعا تۇسكەن.
كەيىن حالىقارالىق EXPO كورمە ورتالىعى، استاناداعى Abu Dhabi Plaza جانە تۇركىستانداعى Karavan Saray ساۋدا-ويىن-ساۋىق كەشەنى سياقتى ءىرى جوبالاردا جۇمىس ىستەگەن. ءبىراز ۋاقىتتان سوڭ قازاقستاندىق مامان اقش-قا قايتا ورالىپ، NBCUniversal كومپانياسىنىڭ كومانداسىنا قابىلدانعان. ال كەيىننەن Walt Disney Imagineering – الەم بويىنشا Disney تاقىرىپتىق ساياباقتارى مەن اتتراكتسيوندارىن جاسايتىن بولىمشەدەن ۇسىنىس العان. بۇل جەردە ماناربەك 3D-ۆيزۋاليزاتسيا مەن AR تەحنولوگيالارىن قولدانا وتىرىپ، Disneyland ءۇشىن يممەرسيۆتى كەڭىستىكتەردىڭ ديزاينىنا جاۋاپ بەرەدى.
«Disney كومپانياسىنا قابىلدانۋ جولىم وڭاي بولمادى. التى رەت سۇحباتتاسىپ، وتە المادىم. مەن كومپانيا مادەنيەتىن تولىق بىلمەيتىنمىن. ء«سىزدىڭ سۇيىكتى Disney كەيىپكەرىڭىز كىم؟» نەمەسە «سۇيىكتى اتتراكتسيونىڭىزدى ايتىڭىز» دەگەن سۇراقتاردى كۇتپەدىم. دەگەنمەن، بەرىلمەي، بوس ورىندارعا ءوتىنىم بەرۋدى جالعاستىردىم. سوڭىندا Walt Disney Imagineering-تەن ۇسىنىس الدىم. بۇل كوماندا ساياباقتار، اتتراكتسيوندار، كرۋيز لاينەرلەرى مەن قوناقۇيلەر جاسايدى»،-دەيدى ول.
ايتۋىنشا، ماڭىزدى فاكتورلاردىڭ ءبىرى – ستۋدەنتتىك جىلدارداعى پورتفوليو بولعان.
«ديپلومدىق جوبامدا كوشپەلى ءومىر سالتى يدەياسىن قالالىق ءومىردى قايتا ويلاستىرۋ كونتسەپتسياسىمەن بىرىكتىرگەن ەدىم. بۇل اعا يمادجينەرلەردى قىزىقتىردى. Walt Disney Imagineering-دە مەن يممەرسيۆتى كەڭىستىكتەرمەن اينالىسامىن. كوپتەگەن دارىستەر مەن ماستەر-كلاسستاردان كەيىن Disney-ءدىڭ ستوريتەللينگتەگى نەگىزگى پرينتسيپتەرىن مەڭگەردىم. وقيعا مەن ەموتسيانى ديزاينعا ەنگىزۋدى، سونداي-اق كرەاتيۆ يدەيالاردى ناقتى ساۋلەت جانە وندىرىستىك شەكتەۋلەرگە بەيىمدەۋدى ۇيرەندىم»،-دەيدى ماناربەك تولەۋ.
قازىرگى تاڭدا قازاقستاندىق مامان Disneyland Monorail ءدامحاناسىن قايتا قالپىنا كەلتىرۋ كونتسەپتسياسى بويىنشا جۇمىس ىستەپ جاتقانىن جەتكىزدى.
«ونى ۋولت ديسنەي سالعان، بىراق 1999 جىلى بۇزىلعان ەكەن. مەن ۇلكەن جاۋاپكەرشىلىك سەزىنەمىن. نوستالگيالىق اتموسفەرانى رەترو-فۋتۋريستىك ستيلدە قايتا جاساۋ قاجەت. وسى ماقساتتا مەن كوپتەگەن تۇپنۇسقا سىزبالاردى زەرتتەدىم. ءساتتى شىعادى دەپ ويلايمىن»،- دەپ قوستى ساۋلەتشى.
