Ūlytau oblysyndaǧy Jaŋaarqa auylynyŋ tumasy Manarbek Töleu Disney kompaniiasynda säuletşı qyzmetın atqaryp jür. Būl turaly Digital Business jazdy, dep habarlaidy «Adyrna» tılşısı.
Ol säulet önerıne bala kezınen qyzyqqanyn mälımdedı. Aituynşa, äkesımen bırge at qoralar men türlı şaruaşylyq nysandaryn salǧan. Keŋıstıktı öz qolymen jasaudy ūnatqan jas jıgıt käsıbi arhitektor bolu üşın Los-Andjelestegı Oŋtüstık Kaliforniia universitetıne oquǧa tüsken.
Keiın halyqaralyq EXPO körme ortalyǧy, Astanadaǧy Abu Dhabi Plaza jäne Türkıstandaǧy Karavan Saray sauda-oiyn-sauyq keşenı siiaqty ırı jobalarda jūmys ıstegen. Bıraz uaqyttan soŋ qazaqstandyq maman AQŞ-qa qaita oralyp, NBCUniversal kompaniiasynyŋ komandasyna qabyldanǧan. Al keiınnen Walt Disney Imagineering – älem boiynşa Disney taqyryptyq saiabaqtary men attraksiondaryn jasaityn bölımşeden ūsynys alǧan. Būl jerde Manarbek 3D-vizualizasiia men AR tehnologiialaryn qoldana otyryp, Disneyland üşın immersivtı keŋıstıkterdıŋ dizainyna jauap beredı.
«Disney kompaniiasyna qabyldanu jolym oŋai bolmady. Alty ret sūhbattasyp, öte almadym. Men kompaniia mädenietın tolyq bılmeitınmın. «Sızdıŋ süiıktı Disney keiıpkerıŋız kım?» nemese «Süiıktı attraksionyŋyzdy aityŋyz» degen sūraqtardy kütpedım. Degenmen, berılmei, bos oryndarǧa ötınım berudı jalǧastyrdym. Soŋynda Walt Disney Imagineering-ten ūsynys aldym. Būl komanda saiabaqtar, attraksiondar, kruiz lainerlerı men qonaqüiler jasaidy»,-deidı ol.
Aituynşa, maŋyzdy faktorlardyŋ bırı – studenttık jyldardaǧy portfolio bolǧan.
«Diplomdyq jobamda köşpelı ömır salty ideiasyn qalalyq ömırdı qaita oilastyru konsepsiiasymen bırıktırgen edım. Būl aǧa imadjinerlerdı qyzyqtyrdy. Walt Disney Imagineering-de men immersivtı keŋıstıktermen ainalysamyn. Köptegen därıster men master-klasstardan keiın Disney-dıŋ storitellingtegı negızgı prinsipterın meŋgerdım. Oqiǧa men emosiiany dizainǧa engızudı, sondai-aq kreativ ideialardy naqty säulet jäne öndırıstık şekteulerge beiımdeudı üirendım»,-deidı Manarbek Töleu.
Qazırgı taŋda qazaqstandyq maman Disneyland Monorail dämhanasyn qaita qalpyna keltıru konsepsiiasy boiynşa jūmys ıstep jatqanyn jetkızdı.
«Ony Uolt Disnei salǧan, bıraq 1999 jyly būzylǧan eken. Men ülken jauapkerşılık sezınemın. Nostalgiialyq atmosferany retro-futuristık stilde qaita jasau qajet. Osy maqsatta men köptegen tüpnūsqa syzbalardy zerttedım. Sättı şyǧady dep oilaimyn»,- dep qosty säuletşı.
