ۇكىمەت مەملەكەت باسشىسى قاسىم-جومارت توقاەۆتىڭ فارماتسەۆتيكا سالاسىنداعى وتاندىق ءوندىرىستىڭ ۇلەسىن ۇلعايتۋ جونىندەگى تاپسىرمالارى شەڭبەرىندە دارىلىك زاتتار ءوندىرىسىن وقشاۋلاۋ جونىندەگى ءتورت ءىرى ينۆەستيتسيالىق جوبانى ىسكە اسىرۋ تۋرالى كەلىسىمدەردى ماقۇلدادى، دەپ حابارلايدى «ادىرنا» ءتىلشىسى.
جوبالار دەنساۋلىق ساقتاۋ مينيسترلىگىنىڭ «التينفارم» جشس، «مسپ-رومفارم» جشس، «ابدي يبراگيم گلوبال فارم» جشس جانە «نوبەل الماتى فارماتسەۆتيكالىق فابريكاسى» اق كومپانيالارىمەن كەلىسىمدەرى شەڭبەرىندە ىسكە اسىرىلاتىن بولادى.
«بەكىتىلگەن جوبالار بويىنشا ينۆەستيتسيالاردىڭ جيىنتىق كولەمى 173 ملرد تەڭگەنى قۇرايدى، شامامەن 675 جاڭا جۇمىس ورنىن قۇرۋ كوزدەلگەن. جاڭا قازاقستاندىق فارماتسەۆتيكالىق كاسىپورىنداردا دارىلىك زاتتاردىڭ 356 اتاۋىن ءوندىرۋ جوسپارلانۋدا»،-دەلىنگەن حابارلامادا.
ءتورت ءىرى زاۋىت الماتى قالاسىندا، سونداي-اق تۇركىستان جانە الماتى وبلىستارىندا ورنالاساتىن بولادى.
وندىرىستىك جەلى ونكولوگيالىق جانە قانت ديابەتىن ەمدەۋگە ارنالعان قۇرالداردى، سونداي-اق يممۋنوبيولوگيالىق، ۆيرۋسقا قارسى، انەمياعا قارسى، اۋىرسىنۋدى باساتىن، قابىنۋعا قارسى، سۋىققا قارسى جانە ميكروبقا قارسى پرەپاراتتاردى قامتيدى. سونداي-اق، حالىقارالىق GMP ستاندارتتارىنا سايكەس بەلسەندى فارماتسەۆتيكالىق ينگرەديەنتتەر مەن بيوپرەپاراتتار شىعارۋ كوزدەلگەن.
