تانىمال رەجيسسەر ءارى ستسەناريست رودجەر اللەرس ۇزاققا سوزىلعان دەرتتەن كەيىن 77 جاسقا قاراعان شاعىندا ومىردەن ءوتتى. قايعىلى حاباردى ونىڭ ارىپتەستەرى جەتكىزدى، دەپ حابارلايدى «ادىرنا» ءتىلشىسى.
اللەرس كينو تاريحىندا «ارىستان پاتشا» (1994) ءمۋلتفيلمىنىڭ رەجيسسەرلەرىنىڭ ءبىرى رەتىندە قالدى. ول بۇل تۋىندىنى روب مينكوففپەن بىرگە تۇسىرگەن ەدى. فيلم الەمدىك پروكاتتا 968 ميلليون دوللاردان استام تابىس جيناپ، ونداعان جىل بويى ەڭ تابىستى انيماتسيالىق فيلم مارتەبەسىن ساقتاپ كەلدى.
ستسەناريست ءارى ستسەناري ءبولىمىنىڭ جەتەكشىسى رەتىندە اللەرس Disney كومپانياسىنىڭ 1990-جىلدارداعى باستى تابىس اكەلگەن جوبالارىن جاساۋعا اتسالىستى. ولاردىڭ قاتارىندا «كىشكەنتاي سۋ پەرىسى»، «الاددين» جانە «سۇلۋ مەن قۇبىجىق» بار. سوڭعىسى انيماتسيا تاريحىندا العاش رەت «ۇزدىك فيلم» نوميناتسياسى بويىنشا «وسكارعا» ۇسىنىلعان تۋىندى بولدى.
كينو سالاسىنان بولەك، اللەرس «ارىستان پاتشا» برودۆەيلىك ميۋزيكلىنە ليبرەتتو جازدى. بۇل قويىلىم تەاتر تاريحىنداعى ەڭ تابىستى جوبالاردىڭ بىرىنە اينالىپ، 1,8 ميلليارد دوللاردان استام تابىس تاپتى. وسى ەڭبەگى ءۇشىن رەجيسسەر «توني» سىيلىعىنا ۇمىتكەر اتاندى.
The Walt Disney Company كومپانياسىنىڭ باسشىسى بوب ايگەر كوڭىل ايتىپ، اللەرستىڭ شىعارماشىلىق كوزقاراسى كومپانيا تاريحىندا تۇتاس ءبىر ءداۋىردى ايقىنداعانىن اتاپ ءوتتى.
رەجيسسەردىڭ سوڭعى جوباسى — «پايعامبار» (2014) ءفيلمى بولدى، وسى تۋىندىدان كەيىن ول شىعارماشىلىقتان الىستادى.
