قازاقستاننىڭ ەڭبەك سىڭىرگەن قايراتكەرى، تانىمال ءانشى گۇلزيرا بوكەيحان دۇنيەدەن ءوتتى، دەپ حابارلايدى "ادىرنا" ۇلتتىق پورتالى.
گۇلزيرا بوكەيحان 1969 جىلى قىتاي حالىق رەسپۋبليكاسىنىڭ شىڭجاڭ ولكەسىندە دۇنيەگە كەلگەن.
1983 جىلى ىلە وبلىستىق ونەر كوللەدجىنە وقۋعا ءتۇسىپ، 1986 جىلى اتالمىش وقۋ ورنىن ءتامامدادى. العاشقى ەڭبەك جولىن ىلە وبلىستىق قازاق ءان-بي تەاترىندا باستادى. كەيىن ءبىلىمىن جەتىلدىرۋ ماقساتىندا 1988–1993 جىلدارى بەيجىڭ ۇلتتىق ۋنيۆەرسيتەتىنىڭ مۋزىكا فاكۋلتەتىندە ۆوكال ماماندىعى بويىنشا ءبىلىم الىپ، باكالاۆر دارەجەسىن يەلەندى.
1999 جىلى تاريحي قازاقستانعا ورالعان گۇلزيرا بوكەيحان قۇرمانعازى اتىنداعى قازاق ۇلتتىق كونسەرۆاتورياسىنىڭ اسپيرانتۋراسىنا قابىلدانىپ، كسرو حالىق ءارتىسى روزا جامانوۆانىڭ جەتەكشىلىگىمەن ءبىلىم الدى. ول وقۋىن 2001 جىلى اياقتادى.
وسى كەزەڭنەن باستاپ ونەر يەسى استانا قالاسىندا ەڭبەك ەتىپ، استانا مەملەكەتتىك فيلارمونياسىندا جانە پرەزيدەنتتىك مادەنيەت ورتالىعىندا ءانشى رەتىندە كورەرمەن ىقىلاسىنا بولەندى. ول قازاق ۆوكال ونەرىنىڭ دامۋىنا ەلەۋلى ۇلەس قوسىپ، شاكىرت تاربيەلەۋ ىسىنە دە اتسالىستى.
