وزبەكستاندا مەملەكەتتىك ورگان قىزمەتكەرلەرى، مەكتەپ وقۋشىلارى مەن ستۋدەنتتەر اراسىندا ەڭ كوپ كىتاپ وقىعان ازاماتتارعا اقشالاي سىياقى بەرىلمەك، دەپ حابارلايدى “ادىرنا” ۇلتتىق پورتالى فەرعاناعا سىلتەپ.
بۇل تۋرالى ەل پرەزيدەنتى ەلدىڭ ادىلەت مينيسترلىگى حابارلادى.
قۇجاتقا سايكەس، 1 ناۋرىزعا دەيىن بارلىق مينيسترلىك پەن ۆەدومستۆو قىزمەتكەرلەردىڭ كاسىبي باعىتىنا ساي ۇسىنىلاتىن ادەبيەتتەر ءتىزىمىن جاسايدى. سونىمەن قاتار جىل سايىن شەتەلدىك اۆتورلاردىڭ كەمىندە ءۇش كىتابى وزبەك تىلىنە اۋدارىلىپ، وعان ساراپشىلاردىڭ تۇسىندىرمەلەرى مەن گلوسساري قوسا بەرىلەدى.
1 ساۋىردەن باستاپ ءاربىر مەملەكەتتىك مەكەمەدە «كىتاپ بۇرىشى» اشىلىپ، قىزمەتكەرلەر ءۇشىن اي سايىن «كىتاپ وقۋ ساعاتى» ۇيىمداستىرىلادى. ۆەدومستۆولاردا وقۋ مادەنيەتىنىڭ ىشكى رەيتينگى جۇرگىزىلەدى. ەڭ كوپ كىتاپ وقىعان شەنەۋنىكتەرگە ارنايى ماتەريالدىق ىنتالاندىرۋ قورى ەسەبىنەن ءبىر ايلىق جالاقى مولشەرىندە سىياقى تولەنەدى.
سونداي-اق ۇزدىك 100 كىتاپسۇيەر قاتارىنا ەنگەن مەكتەپ وقۋشىلارى مەن ستۋدەنتتەر دە ماراپاتتالادى. ولارعا بازالىق ەسەپتىك شامانىڭ 25 ەسەلەنگەن مولشەرىندە — 10,3 ملن سۋم (شامامەن 437 مىڭ تەڭگە) كولەمىندە اقشالاي سىياقى قاراستىرىلعان.
پرەزيدەنت قاۋلىسىندا جاستار ءىسى جونىندەگى اگەنتتىك جانىنان وقۋ مادەنيەتىن دامىتۋ قورى قۇرىلاتىنى ايتىلعان. قور قاراجاتى جاس جازۋشىلاردىڭ شىعارمالارىن باسىپ شىعارۋعا، بالالار ادەبيەتى جوبالارىن قولداۋعا، دارىندى اۆتورلاردى انىقتاۋعا ارنالعان بايقاۋلار وتكىزۋگە جانە ءبىر جىلعا دەيىن اي سايىن 20,6 ملن سۋم نەمەسە 875 مىڭ تەڭگە كولەمىندە تولەم جاساۋعا باعىتتالادى.
بۇدان بولەك، قور ەسەبىنەن جەرگىلىكتى جازۋشىلاردىڭ كىتاپتارىن باسىپ شىعارۋ شىعىندارىنىڭ 50 پايىزى، ال شەتەل ادەبيەتىن وزبەك تىلىنە جانە وتاندىق شىعارمالاردى شەت تىلدەرىنە اۋدارۋ كەزىندە اۆتورلىق قۇقىق شىعىندارىنىڭ 80 پايىزى وتەلەدى.
