سەمەي قالاسىندا ۇلتتىق زياتكەرلىك ويىنداردى دارىپتەۋگە باعىتتالعان «ابايدىڭ زياتكەرلىك ىزىمەن» توعىزقۇمالاق ۇيىرمەسى ءوز جۇمىسىن باستادى. ۇيىرمە اباي وبلىسىنىڭ قوعامدىق كەلىسىم ورتالىعى مەن وڭىرلىك توعىزقۇمالاق فەدەراتسياسىنىڭ بىرلەسۋىمەن اشىلدى.
توعىزقۇمالاق — حالقىمىزدىڭ سان عاسىرلىق مۇراسىنان ورىن العان، ويلاۋ قابىلەتىن جەتىلدىرەتىن زياتكەرلىك ويىن. ول ەسەپكە جۇيرىك بولۋدى، الداعى قادامدى الدىن الا سارالاۋدى جانە تاكتيكالىق شەشىم قابىلداۋدى قالىپتاستىرادى.
ۇيىرمەنىڭ اشىلۋ ءراسىمى وبلىستىق دوستىق ۇيىندە ءوتتى. شارا قازاقستان رەسپۋبليكاسى پرەزيدەنتىنىڭ جارلىعىمەن بەكىتىلگەن قازاقستان حالقى اسسامبلەياسىن 2030 جىلعا دەيىن دامىتۋ تۇجىرىمداماسىندا كورسەتىلگەن جاستاردىڭ وي-ءورىسىن كەڭەيتۋ جانە قوعامدىق كەلىسىمدى نىعايتۋ مىندەتتەرى اياسىندا ۇيىمداستىرىلدى.
ۇيىرمەنى تاجىريبەلى جاتتىقتىرۋشى لەونيد پارفيەۆ جۇرگىزەدى. ونىڭ ايتۋىنشا، ول توعىزقۇمالاقپەن 2000 جىلدان بەرى اينالىسىپ كەلەدى.
2016 جىلدان باستاپ سپورت مەكتەبىندە كاسىبي جاتتىقتىرۋشى رەتىندە جۇمىس ىستەدىم. سوڭعى جىلدارى شاكىرتتەرىم حالىقارالىق جارىستاردا جوعارى ناتيجەلەرگە قول جەتكىزگەن. اتاپ ايتقاندا، وتكەن جىلدىڭ قاراشا ايىندا ماليكا اسەمحانوۆا الەم چەمپيونى اتانعان، - دەدى جاتتىقتىرۋشى.
ءىس-شارا بارىسىندا ارداگەرلەر كەڭەسىنىڭ توراعاسى مۇراتقازى الين ۇيىرمەنىڭ تاربيەلىك ماڭىزىنا توقتالدى.
– ۇستەل ويىندارى ۇلكەندەرگە عانا ارنالعان دەگەن تۇسىنىك دۇرىس ەمەس. توعىزقۇمالاق — جاستار مەن بالالاردىڭ ويلاۋ جۇيەسىن دامىتاتىن ماڭىزدى قۇرال. بۇل ويىن ابايدىڭ ءوزى ەرەكشە ءمان بەرگەن زياتكەرلىك مۇرانىڭ ءبىرى، – دەدى ول.
جيىنعا قازاقستان حالقى اسسامبلەياسىنىڭ مۇشەلەرى، اسسامبلەيا جاستارى جانە ەتنومادەني بىرلەستىكتەردىڭ وكىلدەرى قاتىستى.
ۇيىرمەنىڭ باستى ماقساتى — ۇلتتىق زياتكەرلىك ويىنداردى كەڭىنەن ناسيحاتتاۋ عانا ەمەس، سونىمەن قاتار ەتنوسارالىق تاتۋلىقتى نىعايتىپ، ورتاق قىزىعۋشىلىق نەگىزىندە جاستاردى بىرىكتىرۋ. توعىزقۇمالاق ادال باسەكەنى دارىپتەپ قانا قويماي، جاستاردىڭ ءبىر-بىرىمەن جاقىن ارالاسىپ، ورتاق ىسكە ۇيىسۋىنا مۇمكىندىك بەرەدى.
