بۇعان دەيىن تەمىرتاۋلىق جۋرناليست ولەگ گۋسەۆتىڭ سوتتالۋىنا سەبەپكەر بولعان اتىشۋلى ادۆوكات مۇرات ادام قازىر كەرىسىنشە، ORDA ينتەرنەت-باسىلىمىنىڭ باس رەداكتورى گۇلنارا باجكەنوۆانىڭ قۇقىعىن قورعاپ ءجۇر. سوڭعىسى جالعان اقپارات تاراتتى دەگەن باپپەن تەرگەلىپ جاتقانى بەلگىلى. زاڭگەردىڭ پىكىرىنشە، بۇل – ءوز ۇستانىمىنا قارسى شىعۋ ەمەس. ويتكەنى، ول ەكى ءجۋرناليستىڭ ءىسى ەكى ءتۇرلى باپپەن قوزعالعانىن العا تارتادى.
مۇنداي مالىمدەمەنى مۇرات ادام الماتىدا وزىنە قاتىستى وتكەن سوت تىڭداۋىندا مالىمدەدى. ايتا كەتۋ كەرەك، بۇعان دەيىن قالالىق ادىلەت دەپارتامەنتى ونىڭ ۇستىنەن شاعىم ءتۇسىرىپ، ادۆوكاتتىق ليتسەنزياسىنان ايىرۋدى تالاپ ەتكەن بولاتىن. ويتكەنى، ول گۇلنارا باجكەنوۆانىڭ ۇستىنەن ءجۇرىپ جاتقان تەرگەۋ ءىس-شارالارىنا قاتىستى جالعان مالىمەت تاراتقان دەيدى.
اتاپ ايتقاندا، 2025 جىلدىڭ 1 جەلتوقسانىندا ساعات 12:00-دە باجكەنوۆانىڭ ءۇيى مەن Orda.kz سايتىنىڭ رەداكتسياسىندا سانكتسيالانعان ءتىنتۋ جۇمىستارى جۇرگىزىلە باستاعان. ال، ساعات 12:50-دە مۇرات ادام وقيعا ورنىنا كەلىپ، ءوزىن قورعاۋشىمىن دەپ، تەرگەۋ ىسىنە ارالاسۋىن تالاپ ەتكەن. دەسە دە، ءدال سول ساتتە زاڭگەردىڭ مۇنداي قۇقىعى بولماعان، ياعني ول مۇنى راستايتىن ەشقانداي قۇجات كورسەتە الماعان. ادىلەت دەپارتامەنتىنىڭ ايتۋىنشا، پروتسەسسۋالدىق ستاتۋسى بولماعان جاعدايدا ادۆوكات تەرگەۋ ىسىنە ارالاسا المايدى. سوعان قاراماستان ادام ساعات 14:30-دا الەۋمەتتىك جەلىدە (Facebook, YouTube, Instagram) ءوزىن تەرگەۋگە جىبەرىلمەي جاتقانىن ايتىپ، 16 جازبا قالدىرىپتى. وسىلايشا ول قوعام الدىندا تەرىس تۇسىنىك قالىپتاستىرعان.
ايتا كەتەتىن ءبىر جايت، بۇعان دەيىن تەمىرتاۋلىق جۋرناليست ولەگ گۋسەۆ ءىستى بولعان كەزدە ءدال وسى مۇرات ادام ايىپتاۋ جاعىنا شىعىپ، كۇدىكتىنى باس بوستاندىعىنان ايىرۋدى تالاپ ەتكەن بولاتىن. ال، قازىر كەرىسىنشە، وزگە ءجۋرناليستىڭ ىسىندە ءسوز بوستاندىعىنىڭ بۇزىلىپ جاتقانىن ايتىپ دابىل قاعۋدا. ادۆوكاتتىڭ ءوزى مۇنى ەكىجۇزدىلىك ەمەس، قالىپتى جاعداي دەگەندى ايتىپ وتىر.
«بۇل ەكەۋى مۇلدەم ەكى ءتۇرلى ءىس، ەكى ءتۇرلى باپتار. تاعى ايتامىن، بۇل ەكى ءجۋرناليستىڭ جاعدايى ەكى ءتۇرلى. گۋسەۆتىڭ ءىسى ءسوز بوستاندىعىنا قاتىستى ەمەس. ول كورىنەۋ جالعان اقپارات تاراتتى دەپ سوتتالعان جوق، ول جەكە مالىمەتتەردى تاراتتى دەپ سوتتالدى. مىنە، ەكەۋى ەكى ءتۇرلى باپ»، - دەدى مۇرات ادام.
ونىڭ سوزىنشە، گۇلنارا باجكەنوۆا ءوزىنىڭ كاسىبي مىندەتىن اتقارعانى ءۇشىن ءىستى بولىپ جاتىر.
ەسكە سالايىق، بۇعان دەيىن ادۆوكات مۇرات ادامنىڭ اتسالىسۋىمەن تەمىرتاۋلىق جۋرناليست ولەگ گۋسەۆ ءۇش جىلعا باس بوستاندىعىنان شەكتەۋ جازاسىنا تارتىلعان بولاتىن. وعان ينتەرنەتتەگى اشىق دەرەككوزدەن العان ماتەريالىن دۇرىس ەمەس ماقساتتا تاراتتى دەگەن ايىپ تاعىلعان. ياعني، زاڭگەرلەر مۇنى قوعام ءۇشىن قاۋىپتى ارەكەت دەپ تاۋىپتى.
