قازىرگى تاڭدا ەلىمىز بىرەگەي سۋ تاپشىلىعى جاعدايىندا تۇر. سۋ رەسۋرستارىنىڭ جارتىسىنان استامى قىتاي، وزبەكستان، قىرعىزستان جانە رەسەي سياقتى كورشىلەس ەلدەردەن كەلەدى. بۇل تۋرالى ساراپشى ازامات قاۋازوۆ ايتتى، دەپ حابارلايدى «ادىرنا» ءتىلشىسى قازاقپاراتقا سىلتەمە جاساپ.
ول ءار كورشى ەلمەن كەلىسىمدەر جۇيەسىن قالىپتاستىرۋ قاجەتتىگىن مالىمدەدى.
«جاعدايدى كليماتتىڭ وزگەرۋى ءجيى قيىنداتادى. سونىڭ سالدارىنان تاۋەكەلدەر ارتىپ، سۋ تاپشىلىعى كۇشەيە تۇسەدى. وسى تۇرعىدا جەر استى سۋلارىن پايدالانۋ قالىپتاسقان جاعدايدان شىعۋدىڭ ءتيىمدى جولى بولىپ وتىر»،-دەدى قاۋازوۆ.
ساراپشى سۋدى ۇنەمدەۋ تەحنولوگيالارىن، اسىرەسە، اۋىل شارۋاشىلىعىندا قولدانۋدىڭ ماڭىزدىلىعىن اتاپ ءوتتى. بۇل 2026 جىلدىڭ ۆەگەتاتسيالىق كەزەڭىندە بولجانىپ وتىرعان 1 ملرد تەكشە مەترگە دەيىنگى سۋ تاپشىلىعى اياسىندا اسا وزەكتى.
«تسيفرلاندىرۋ مەن سۋ ۇنەمدەۋ تەحنولوگيالارىن ەنگىزۋ — قولدانىستاعى پروبلەمالاردى شەشۋگە باعىتتالعان ناقتى قادام. اۋىل شارۋاشىلىعىندا سۋارۋ جۇيەلەرى ارقىلى سۋ جەتكىزىلەدى، الايدا ولاردىڭ باسىم بولىگى بەتوندالماعان، جەر ارنالاردان تۇراتىندىقتان، سۋ شىعىنى 50 پايىزعا دەيىن جەتەدى. ەلىمىزدىڭ وڭتۇستىگىندە ماقتانى كۇرىش سەكىلدى باستىرىپ سۋارۋ ادىسىمەن سۋاراتىن جاعدايلاردى ءوز كوزىممەن كوردىم. بۇل باقىلاۋدىڭ جوقتىعى مەن سۋدىڭ ارزاندىعىنان بولىپ وتىر. فەرمەرلەر ونى ۇنەمدەۋگە مۇددەلى ەمەس. باعانىڭ تومەندىگى «قازسۋشار» رەسپۋبليكالىق مەملەكەتتىك كاسىپورنىنىڭ قارجىلاندىرۋدى از الۋىنا اكەلىپ، سۋارۋ جەلىلەرىن ءتيىستى دەڭگەيدە ۇستاۋعا مۇمكىندىك بەرمەيدى»،-دەپ ءتۇسىندىردى ول.
قاۋازوۆتىڭ پىكىرىنشە، تسيفرلاندىرۋ شىعىنداردى ناقتى ەسەپتەۋگە، سۋ رەسۋرستارىن تەڭ ءبولۋدى قامتاماسىز ەتۋگە كومەكتەسەدى. ماۋسىم كەزىندە سۋعا دەگەن سۇرانىس شارىقتاۋ شەگىنە جەتىپ، رەسۋرستار ءبىر مەزەتتە جەتىسپەۋى مۇمكىن. مۇنداي جاعدايدا اۆتوماتتاندىرىلعان ەسەپتەگىشتەر مەن ديسپەتچەرلىك جۇيەلەر سۋ شىعىنىن تىركەپ، باسقارۋشىلىق شەشىمدەردى ناقتى دەرەكتەرگە سۇيەنە وتىرىپ قابىلداۋعا مۇمكىندىك بەرەدى.
ساراپشى فەرمەرلەردى سۋارۋ نورمالارىنا ۇيرەتۋ، داقىلداردى ءارتاراپتاندىرۋ جانە سۋدى ناقتى ەسەپكە الۋ ماڭىزدى ەكەنىن اتاپ ءوتتى. "بۇل شارالار قولدانىلعان جاعدايدا قۇقىق قورعاۋ ورگاندارىن تارتۋدىڭ قاجەتى بولمايدى، سەبەبى قازىرگى ۋاقىتتا سۋ تاپشىلىعىنا بايلانىستى كەيبىر كولەڭكەلى سحەمالار قالىپتاسىپ وتىر: بىرەۋلەر ارنالارعا زاڭسىز قوسىلادى نەمەسە پايدالانىلعان سۋدىڭ كولەمىن ازايتىپ كورسەتەدى. اۆتوماتتاندىرىلعان جۇيەلەر بۇل ماسەلەنى تولىق شەشۋگە قاۋقارلى",- دەيدى مامان.
سونداي-اق ول بيىلعى جىلعا قاتىستى سۋ تاسقىنى مەن قۋاڭشىلىق تۋرالى تۇپكىلىكتى بولجام جاساۋ ازىرگە ەرتە ەكەنىن ايتتى.
«بيىل قار مولشەرى ادەتتەگىدەن از، سوندىقتان الدىن الا باعالاۋ بويىنشا كوكتەمدە ايتارلىقتاي سۋ تاسقىنى بولۋى ەكىتالاي. الايدا بۇل الدىن الا بولجام: اقپاننىڭ سوڭىندا نەمەسە ناۋرىز ايىندا قار جاۋى مۇمكىن، سونداي-اق كوپ نارسە كوكتەمنىڭ ءوز سيپاتىنا بايلانىستى. قار جامىلعىسى از بولعاننىڭ وزىندە كۇرت ەرۋ نەمەسە جاۋىن-شاشىندى اۋا رايى سۋ تاسقىنىنا جاعداي تۋعىزۋى ىقتيمال»،- دەپ اتاپ ءوتتى ساراپشى.
