قاتەرلى قۋاڭشىلىق جايلى وڭىرلىك كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا ەرتىس اۋدانىنىڭ اكىمى بولاتبەك ءشارىپوۆ ايتتى.
"بۇگىندە ەگىن ەگىلدى، بىراق بيىل قۋاڭشىلىققا بايلانىستى سۋدىڭ جاعاسىندا ورنالاسقان اۋىلداردا ەگىن ماسەلەسىنە قاتىستى جاعداي قيىن بولۋى مۇمكىن. قىزىلجار، قاراقۇدىق، يسا بايزاقوۆ، سەۆەرنىي اۋىلدىق وكرۋگتەرىندە جاۋىن كەش جاۋدى، سوندىقتان ولار قۇرعاقشىلىققا تاپ بولدى. بولجام بويىنشا، ەگىستىك كولەمىنىڭ 10-15 مىڭ گەكتارى جارامسىز بولىپ قالۋى مۇمكىن", - دەدى ەرتىس اۋدانىنىڭ اكىمى بولاتبەك ءشارىپوۆ.
ەرتىس اۋدانى اكىمىنىڭ سوزىنشە، پانفيلوۆ، ۇزىنسۋ، قوساعاش، اعاشورىن، قوسكول، امانگەلدى اۋىلدىق وكرۋگتەرىندە ەكى رەت وتكىنشى جاڭبىر جاۋىپ وتكەندىكتەن، جاعداي بىرقالىپتى.
"دالالىق اۋماقتاعى اۋىلداردا استىق ونىمدىلىگى جاقسى بولادى. سەبەبى بۇل ەلدى مەكەندەردە جاڭبىر جاۋىپ، قۋاڭشىلىقتان امان قالدى. اگرونوم رەتىندە بيداي 10-12 تسەنتنەر دەڭگەيىندە تۇرعانىن كورىپ تۇرمىن", - دەدى بولاتبەك ءشارىپوۆ.
سونداي-اق بولاتبەك ءشارىپوۆ اۋداندا قۋاڭشىلىققا بايلانىستى توتەنشە جاعداي رەجيمىن ەنگىزۋ تۋرالى ماسەلە جوق ەكەنىن ايتتى.
"قۋاڭشىلىق ماسەلەسى بار ەكەنىن جاسىرمايمىن، الايدا توتەنشە جاعدايدى ەنگىزۋ ماسەلەسى كوتەرىلمەدى", - دەدى اۋدان اكىمى.
"ادىرنا" ۇلتتىق پورتالى
