«AMANAT» پارتياسى فراكتسياسىنىڭ مۇشەسى ءۇنزيلا شاپاق پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆكە بالالاردىڭ ونلاين ويىن پلاتفورمالارىن پايدالانۋىن شەكتەۋ تۋرالى دەپۋتاتتىق ساۋال جولدادى، دەپ حابارلايدى «ادىرنا» ءتىلشىسى.
ول بۇگىندە ينتەرنەت پەن ونلاين ويىن پلاتفورمالارى بالالاردىڭ كۇندەلىكتى ءومىرىنىڭ اجىراماس بولىگىنە اينالعانىن مالىمدەدى.
«سولاردىڭ ءبىرى – Roblox ونلاين-پلاتفورماسى. قازىرگى تاڭدا «Roblox» ءسوزىن بىلمەيتىن بالا جوق. بۇل پايدالانۋشىلارعا ءوز ويىندارىن قۇرۋعا، ۆيرتۋالدى الەمدەردە قارىم-قاتىناس جاساۋعا جانە باسقا ويىنشىلارمەن تىكەلەي بايلانىس ورناتۋعا مۇمكىندىك بەرەتىن حالىقارالىق پلاتفورما. 2025 جىلعى اشىق دەرەككوزدەرگە سايكەس، Roblox پلاتفورماسىنا كىرەتىن كۇندەلىكتى بەلسەندى قولدانۋشىلار سانى 150 ميلليونعا جۋىق. پايدالانۋشىلاردىڭ باسىم بولىگىن كامەلەتكە تولماعان بالالار مەن جاسوسپىرىمدەر قۇرايدى.
اتا-انالار، پەداگوگتەر جانە حالىقارالىق ساراپشىلار تاراپىنان Roblox ويىنىنىڭ بالالار پسيحيكاسىنا كەرى اسەر ەتۋى مۇمكىن ەكەندىگى تۋرالى الاڭداۋشىلىق ءجيى كوتەرىلۋدە. اتاپ ايتقاندا، ۆيرتۋالدى تاۋەلدىلىك، اگرەسسيۆتى مىنەز-قۇلىق، شىنايى ومىردەن الشاقتاۋ، سونداي-اق جاس ەرەكشەلىگىنە ساي كەلمەيتىن كونتەنتپەن بەتپە-بەت كەلۋ فاكتىلەرى كەزدەسەدى. «ويىننان وت شىعار» دەمەكشى، بالالاردىڭ پسيحولوگيالىق دامۋىنا مۇنداي فاكتورلاردىڭ اسەرى ۇزاق مەرزىمدى تەرىس سالدارعا اكەلۋى ىقتيمال»،-دەدى دەپۋتات.
ايتۋىنشا، تۇركيا، كاتار، رەسەي، قىتاي، يران، سولتۇستىك كورەيا جانە باسقا دا مەملەكەتتەردە اتالعان پلاتفورما بۇعاتتالعان.
ءۇنزيلا شاپاق الاياقتار مەن پەدوفيلدەردىڭ ويىندار ارقىلى بالالارعا اسەر ەتۋ ارەكەتتەرىن دە اتاپ ءوتتى.
«Roblox سياقتى اشىق ونلاين-پلاتفورمالاردا كامەلەتكە تولماعان بالالارعا قاتىستى قىلمىستىق نيەتى بار تۇلعالاردىڭ، سونىڭ ىشىندە پەدوفيلدەر مەن الاياقتاردىڭ بەلسەندى ارەكەت ەتەتىنى تۋرالى دەرەكتەر بار. ولاردىڭ تاكتيكالارى قاراپايىم، الايدا حيرۋرگيالىق دالدىكپەن جاسالاتىنداي. الدىمەن ويىنداعى ۆيرتۋالدى چات ارقىلى بالانىڭ سەنىمىنە كىرىپ، كەيىننەن Roblox-تان تەلەگرامعا كوشىپ، قۇپيا كەزدەسۋگە شاقىرادى جانە اياعى قايعىلى وقيعامەن اياقتالۋى مۇمكىن. ال الاياقتار ءدال وسىلاي بالانىڭ سەنىمىنە كىرىپ، وعان سىيلىق بەرۋگە ۋادە بەرىپ، اتا-اناسىنىڭ كارتاسىنىڭ نومەرىن جانە سمس-كودتى سۇرايدى. بالا سەنىپ ايتقاندارىن ورىندايدى، ناتيجەسىندە كارتادان اقشا شەشىلىپ الىنادى. ارينە، كومپانيا «بالالارعا ەڭ قاۋىپسىز ورتا جاسايمىز» دەپ جار سالۋدان جالىعار ەمەس. بىراق سەكۋندىنا 50 مىڭنان استام حابار اعىلىپ جاتقان ورتانى تولىق باقىلاۋ مۇمكىن ەمەس. 2025 جىلدىڭ 18 جەلتوقسانىندا قازاقستان رەسپۋبليكاسىنىڭ مادەنيەت جانە اقپارات ۆيتسە-ءمينيسترى ەۆگەني كوچەتوۆتىڭ بەرگەن جاۋابىندا: ء«بىز Roblox-تى بلوكتاۋ نەمەسە شەكتەۋ ماسەلەسىن قاراستىرمايمىز» دەپ ايتقان بولاتىن. بۇل رەتتە «بالانىڭ قۇقىقتارى تۋرالى» قر زاڭىنا سايكەس، مەملەكەتتiك ورگاندار، جەكە جانە زاڭدى تۇلعالار بالانى ونىڭ دەنساۋلىعىنا، يماندىلىق جاعىنان جانە رۋحاني دامۋىنا زيان كەلتiرەتiن الەۋمەتتiك ورتانىڭ، اقپاراتتىڭ، ناسيحات پەن ۇگiتتiڭ تەرiس ىقپالىنان قورعاۋعا مiندەتتى»،-دەدى ول.
دەپۋتات قازاقستاندا پلاتفورمانىڭ قىزمەتىن شەكتەۋ نەمەسە باقىلاۋ مەحانيزمدەرىن ەنگىزۋ ماسەلەسىن قاراستىرۋدى، سونداي-اق بالالاردىڭ ينتەرنەتتەگى قاۋىپسىزدىگىن قامتاماسىز ەتۋ شارالارىن ناقتىلاۋدى سۇرادى. سونداي-اق ءىىم مەن باس پروكۋراتۋرادان ونلاين ويىندار ارقىلى تىركەلگەن قۇقىق بۇزۋشىلىقتار تۋرالى اقپارات بەرۋدى تالاپ ەتتى.
