تانىمال بلوگەر قايسار قامزاعا حالىقارالىق ىزدەۋ جاريالاندى. بۇل تۋرالى بۇگىن، 14 قاڭتاردا قارجىلىق مونيتورينگ اگەنتتىگى ايتتى، دەپ حابارلايدى
«قازاقستان رەسپۋبليكاسىنىڭ ازاماتى 1995 جىلعى 18 قىركۇيەكتە تۋعان قامزا قايسار باقىتجانۇلىنا حالىقارالىق ىزدەۋ جاريالاندى. سوتپەن وعان قاتىستى «قاماۋدا ۇستاۋ» تۇرىندەگى بۇلتارتپاۋ شاراسى سانكتسيالانعان»،-دەلىنگەن حاباردامادا.
بلوگەر زاڭسىز ويىن بيزنەسىنە جاردەمدەستى دەگەن كۇدىككە ىلىنۋدە.
كۇدىكتى 5 جىل بويى «Instagram» الەۋمەتتىك جەلىسىندە، «qais_arr» اتاۋىمەن (2,4 ملن جازىلۋشى) بەلسەندى بلوگەرلىك قىزمەت جۇرگىزىپ، سونداي-اق «Telegram»-داعى «قورا ەنتەرتەينمەنت» جابىق ارناسىن (368 مىڭ جازىلۋشى) باسقارعان.
«كۇدىكتى الەۋمەتتىك جەلىلەردەگى جەكە اككاۋنتتارىن پايدالانا وتىرىپ، قازاقستان رەسپۋبليكاسىنىڭ ازاماتتارى ءۇشىن «Pinco» سايتىندا تىركەلۋگە جانە قۇمار ويىندارعا قاتىسۋعا باعىتتالعان تىكەلەي سىلتەمەلەردى، گرافيكالىق ەلەمەنتتەردى جانە ۇندەۋلەردى قامتيتىن بەينەماتەريالدار مەن جاريالانىمداردى جۇيەلى تۇردە ورنالاستىرعان. سونىمەن قاتار بەينەروليكتەردىڭ استىندا پايدالانۋشىلارعا بونۋس بەرەتىن جەكە پروموكودىن كورسەتكەن. وسىلايشا، قامزا ق.ب. ازاماتتاردى قۇمار ويىندارعا تارتۋعا باعىتتالعان ونلاين-پلاتفورمانى جارنامالاپ، ويىن پلاتفورماسىنان سىياقىلار، بونۋستار نەمەسە پايىزدىق اۋدارىمدار تۇرىندە تابىس الىپ وتىرعان»،-دەپ تولىقتىردى قما.
زاڭسىز جولمەن الىنعان كىرىستەردى جاسىرۋ ماقساتىندا كۇدىكتى كريپتوامياندى پايدالانعان. وعان «Pinco» ينتەرنەت-كازينوسىنىڭ ۇيىمداستىرۋشىلارىنان تولەمدەر ءتۇسىپ وتىرعان. سوت سانكتسياسىمەن 182 736,741 USDT كولەمىندەگى كريپتواكتيۆتەرگە تىيىم سالىندى.
